DILI, 10 setembru (TATOLI)-Fatu-ahi loromatan nia roman foin mihis. Inur Fatucama hakmatek iha anin maus huu dadeer. Sarani sira husi ponta leste no mós husi Becora mai to’o Mandarin, la’o-ain rumo ba Tasi-tolu, fatin ba misa Solene Sua Santidade Papa Francisco nian, ho kontente iha dadeer ne’e.
Segundu ba minutu, oras hatudu tuku neen. Iha luron sidade Dili nian, iha dadeer ne’e sarani sira ho otas oioin – labarik, foinsa’e no ferik katuas: feto mane, ho entuziasmu hatudu sira-nia ‘fiar’ hodi konkista distánsia, la’o ba Tasi-tolu – fatin ne’ebé Papa João Paulo II mós halo misa iha tinan-1989, perante timoroan sira.
Tuir observasaun TATOLI iha loron ohin – iha dadeer ne’e, alende la’o ain, sarani balun ho karreta: Baskulante, Anguna, etc, ba Tasi-tolu hodi partisipa atividade Ekleziastika ne’ebé sei prezide direta husi Amu Papa.
Tuir oráriu ne’ebé mak iha katak misa solene hahú tuku 4 lorokraik maibé dadeer ne’e sarani sira sai sedu. Nune’e, observa mós katak sarani sira lori kedas ho bukae – hodi kalsu estomagu ba loron ohin, loron “importante” ida ba timoroan sira tanba sei asiste direta Amu Papa.
Nune’e tuir oráriu iha tuku 8:35 papa sei husi fatin nunsiatura Motael atu ba vizita labarik sira iha madre Alma Praia dos Coqueiros, nune’e sarani sira tuir dalan antuziasmu nafatin atu simu bensaun husi lider katólika nian.
Depois papa vizita labarik sira iha ALMA fila fali ba katedrál hodi enkontru ho líder relijiozu sira.
Iha fatin ketak, bainhira tuku 8h35 liuhusi Tasi-ibun Farol, Sua Santidade akompaña ho seguransa sira liubá AlMA. Iha dalan-ninin, iha loromatan dadeer nia terik sarani hein no simu bensaun husi Papa Francisco. Dadeer ne’e sarani sira entuziasmu nafatin hanesan horseik maske sarani sira menus tanba barak ba ona Tasi-tolu.
Jornalista : Felicidade Ximenes
Editór: Rafael Ximenes de A. Belo
