DILI, 10 de setembro de 2024 (TATOLI) – Augosto Soares, idade 73, no Marta do Rosário Fátima, idade 71, akompaña ho oan feto ida, hosi Posto Administrativu Soibada, Munisípiu Manatuto, entuziasmu hodi partisipa misa ne’ebé sei diriji hosi Papa Francisco, iha Tasi Tolu, Dili.
“Ha’u nia idade 73 ona, maibé ha’u hakarak tuir misa iha Tasi Tolu, tanba nu’udar ema sarani ida, ha’u mós hakarak husu bensaun ba Maromak atu bele hetan grasa oioin iha moris ne’e”, Augosto Soares dehan ba Tatoli, iha Tasi Tolu, Dili.
Tuir nia, sira prepara rasik merenda, hahán meiudia no bee ne’ebé sifisiente hodi bele konsumu hodi hein ba misa.
Nune’e mós, Marta do Rosário Fátima konta katak sira hosi Soibada deskansa iha Balide, Dili, no ohin dadeer ho kareta ba estasiona iha Rai Kotu hodi la’o ba Tasi Tolu. “Há’u halo ona idade 71. Ha’u sofre moras Ispa ba tinan naruk nia laran, tanba ne’e mak há’u mai hakarak tuir misa hodi bele hetan bensaun husi Maromak liuhusi Santu Padre”, tenik nia.
Nia haktuir katak bá Maromak, nia nunka senti kolen, maske lorona manas makas, tanba Maromak mak hamahan ema nia isin.
Notísia relevante: Sarani Becora hahú preparasaun ba tuir misa iha Tasi Tolu
Jornalista: Domingos Piedade Freitas
Editora: Isaura Lemos de Deus
