DILI, 11 setembru 2024 (TATOLI)—Iha sarani sira-né’ebé hein sua Santidade Papa Francisco iha Sentru Konvensaun Dili (CCD) nia li’ur ne’e nia leet, vendedora ambulante Ana Rosalía Fernandes ne’ebé hein no hala’o atividade negósiu hodi buka doit-metan oan ruma hodi hatutan moris.
Notísia Relevante: Reprezentante juventude 3.000 hein Papa Francisco nia prezensa iha CCD
Nia hateten, ninia negosiu ba loron ida-ne’e hetan rendimentu di’ak tanba peregrinu sira-ne’ebé mai halibur iha CCD hodi hein Papa Francisco kontribui ona renidmentu ba negósiu ne’ebé nia halo.
“Ha’u sente kontente ba loron ida-ne’e, tanba ha’u hetan rendimentu di’ak kompara ho loron sira antes ne’e,” nia dehan ba Agência Tatoli iha CCD, kuarta ne’e.
Nia dehan, antes ne’e nia faan iha tempu kalan de’it iha CCD nia oin, hahú husi tuku 20h00 kalan to’o 11h00 kalan, nia hetan boot liu mak $30, maibé ohin dadeer ne’e foin mak oras ida resin de’it hahú husi tuku 07h15 to’o tuku 09h00 ne’e, nia hetan ona $60.
Nia espera, durante Papa Ninia vizita iha CCD ne’e, ninia negósiu ne’e bele hetan liután rendimentu renimentu di’ak no fó liutan espasu ba sira atu buka moris hodi hadi’a nesesidade família nian.
Tuir nia, sasán ne’ebé nia faan mak hanesan sigaru, Pop Mi, Kafé, no revusadu inklui bebida no bee hemu nian,
Renidmentu ne’ebé nia hetan ne’e, nia dehan, tanba peregrinu sira barak hakarak han no hemu entaun sira mai sosa sasán ne’ebé nia faan ne’e.
Nune’e, nia garante katak foin oras ida resin mak hetan ona rendimentu hanesan ne’e fiar katak molok Papa sai husi CCD nia sei hetan rendimentu dia’ak liután.
Jornalista : Tomé Amado
Editór : Cancio Ximenes
