Reprezentante juventude 3.000 hein Papa Francisco nia prezensa iha CCD
DILI, 11 setembru 2024 (TATOLI)—Reprezentante juventude Katólika ema 3.000, kuarta (11 setembru 2024) ne’e, hahú husi tuku 04h00 dadeersan, hein no konsentra ona iha Sentru Komvensaun Dili (CCD, siglá portugés) hodi hein prezensa Sua Santidade Papa Francisco.
Tuir oráriu vizita pastorál Amu Papa nian enkontru ho reprezentante foinsa’e Katólika mai husi dioseze Dili, Baucau no Maliana ho partisipante hamutuk 3.000 ne’e iha tuku 09h30.
Tuir observasaun jornalista TATOLI iha terrenu nota katak, hahú husi tuku 04h00 dadeersan partisipante ne’e hahú konsentra ona iha CCD hodi hein prezensa Sua Santidade nian.
Aleinde ne’e, parte ekipa konjunta husi PNTL no F-FDTL fó seguransa másimu iha aredór CCD nian atu asegura fatin ne’e seguru hodi bele realzia enkontru entre Papa Francisco ho reprezentante juventude Timor-Leste.
Iha aredór CCD nian portaun asesu loke de’it parte liman karuk ho liña rua ne’ebé juventude sira tama halo screeaning husi komisaun organizadora.
Entretantu, husi dalan rezidénsia Nunsiatura Motael mai to’o CCD ne’e, tutir dalan, sarani balun komesa hein ona iha dalan ninin hodi hein Papa Francisco atu liu husi dalan ne’e.
Iha iha área semáforu nian ne’e no iha rotunda estátua Francisco Xavier Amaral to’o mai portaun entrada CCD nakonu ho sarani wa’in-wa’in ne’ebé hein Papa atu liu hahú husi dadeersan.
Hakarak rona Papa Francisco nia mensajen
Reprezentante juventude dioseze Baucau, Cristalina Correia, hateten iha enkontru entre Papa Francisco no juventude Timor-Leste ne’e, nia parte hakarak atu rona Papa nia mensajen ba juventude Timor-Leste.
“Ha’u mai madrugada tanba hakarak atu rona Papa Francisco nia mensajen ba ami joven atu oinsá sai juventude ne’ebé inteletuál, maduru no iha mentalidade. Ami hein ho kontente tebes hodi hein prezensa sua santidade Papa Francisco iha CCD ne’e. Papa sei hasoru malu ho ami, tanba ne’e ami kontente tanba bele hasoru direta São Pedro nia saseluk ne’e no hetan mós mensajen furak hodi moris tuir nu’udar joven timoroan ne’ebé nakonu ho espíritu domin,” Reprezentante joven husi diocese Baucau, Cristalina Correia, hateten ba Agência Tatoli iha CCD, kuarta ne’e.
Nia hatutan, prezensa sua santidade Papa ne’e hametin liután joven sira-ne’ebé fiar katólika nian, tanba santu padre líder katóliku mundiál ida-ne’ebé moris ho simplisidade, hakraik aan no hadomi ema hotu.
Joventude husi Dioseze Dili, Gregório Guterres, mós manifesta nia sentimentu ho emosionál katak prezensa Papa Francisco iha Timor-Leste ne’e lori bensaun ba pás no domin.
“Ha’u sente kontente no orgullu tanba hanesan jerasaun foun foin primeiravés hetan Papa Francisco nia oin. Nakonu ho esperansa katak prezensa Papa nian ne’e lori bensaun ne’ebé úniku mai ita Timor-Leste, tanba ne’e nu’udár joven ha’u kontente no la sente kolen mezmu mai madrugada,” nia dehan.
Nia hatutan, buat ida-ne’ebé presiza apreende husi Papa Francisco nia vizita ne’e mak ninia simplisidade no hakraik aan ne’e.
“Papa karákter ida-ne’e mak bele hametin liután ami-nia fiar no ida-ne’e ita sarani hotu-hotu presiza banati tuir,” nia dehan.
Tuir ajenda hafoin ramata enkontru ho foinsa’e Katólika iha tuku 10h30, Amu Papa sai husi CCD ba iha aeroportu internasionál Nicolau Lobato, Comoro hodi voo ho destinasasun vizita pastorál ba Singapura.
Enkuantu, ho hasoru malu foinsa’e Katólika nu’udar ajenda ikus Amu Papa nia vizita loron ikus nian iha Timor-Leste.
Papa Francisco hala’o vizita pastoral durante loron tolu iha Timor-Leste husi 9-11 Setembru 2024.
Jornalista : Nelson de Sousa/Osória Marques
Editór : Cancio Ximenes
