SINGAPURA, 12 setemberu 2024 (TATOLI) – Papa Francisco husu ba Governu Singapura atu tau matan didi’ak ba povu ki’ak, idozu no traballadór imigrante iha Singapura.
Santu Padre louva susesu polítika Governu Singapura nian hodi apoia ki’ak no mukit sira, maibé nia apela ba autoridade Singapura atu fó atensau espesiál ba povu ki’ak, idozu no traballadór imigrante.
“Hau rekonñese polítika no inisiativa oioin Governu Singapura halo ona hodi fo asisténsia ba grupu vulneravel oioin, maibé ha’u esperak katak Governu sei fó atensaun espesiál liu ba ki’ak, idozu no traballadór imigrante sira,” Papa Francisco hato’o lia hirak ne’e durante enkontru ho membru governu, sosiedade sívil no korpu diplomátiku Sentru Kulturál, Universidade Nasional Singapura (NUS-Sigla Inglés), kinta ne’e.
Sua Santidade hatete grupu ki’ak no idozu fó kontribuisaun boot ba dezenvolvimentu iha nasaun ne’e.
“Ki’ak no idozu sira mak hatuur hela fundasaun ba nasaun Singapura ida be ohin loron ita haree kapas tebes,” Santu Padre tenik.
Tuir estudu husi NUS hato’o katak 26% husi uma-kain hotu iha Singapura seidauk hetan saláriu natoon ba nesesidade bázika lor-loron nian.
Enkuantu, tuir dadus estatístika governu Singapura, populasaun idozu ho idade-65 ba leten hamutuk 700,000-resin. Populasun hirak ne’e kategoria mós nu’udar grupu ki’ak iha Singapura.
Sua Santidade mós husu ba Governu Singapura atu proteje traballadór imigrante iha Singapura.
“Traballadór hirak ne’e fó kontribuisaun boot ba nasaun ne’e. Tanba ne’e, Estadu Singapura tenke garantia saláriu justu ba sira,” Santu Padre lamenta.
Bazeia ba dadus estatístika Governu Singapura 2022, populasaun imigrante hamutuk 1.4 miliaun mak hela no serbisu iha Singapura.
Iha ninia intervensaun, Prezidente Repúblika Singapura, Tharman Shanmugaratnam hato’o agradese ua’in ba Igreza Katólika nia apoiu tomak ba Sigapura durante ne’e.
“Ha’u hakarak hato’o obrigadu ua’in ba kontribuisaun direta no indireta husi Igreza Katólika ba Singapura durante ne’e, liuliu iha área edukasaun, saúde no asisténsia sosiál,” Tharman dehan.
Jornalista: Filomeno Martins
Editór: Rafael Ximenes de A. Belo
