“Tau-matan didi’ak ba povu di’ak ida ne’e”-liafuan ikus Papa Francisco ba PR Horta
DILI, 12 setembru 2024 (TATOLI) – Prezidente Repúblika, José Ramos Horta hateten, bainhira Sua Santidade Papa Francisco atu sa’e ona aviaun Aero Dili hodi kontinua viajen ba Singapura husik hela liafuan ikus katak “Tau-matan didi’ak ba povu di’ak ida ne’e”.
“Tuir protokolu ha’u labele lori nia to’o elevadór atu sa’e ba aviaun ne’e, maibé Papa dada ha’u nia liman ba to’o elevadór ne’e nia husik hela lia menon ikus katak “taumatan didi’ak ba povu di’ak ida ne’e”, haktuir liamenon Papa Francisco ba Xefe Estadu ne’ebé nia rasik hateten ba jornalista sira iha Palásiu Przidensiál Dili, kinta ne’e.
Nia dehan, durante enkontru bilaterál ho Papa Francisco, Papa apresia no orgullu ho povu Timor-Leste ne’ebé simu nia di’ak tebes.
“Durante ha’u enkontru ho Papa nia dehan mai ha’u, “ha’u nu’uka hasoru povu ida di’ak tebes nune’e, resepsaun ne’ebé fó ba ha’u, halo ba ha’u di’ak tebes no ha’u sei la haluha,” Horta haktuir tan.
Ramos Horta dehan tan, “Bainhira Papa atu sai nia mós sei dehan tan, mai lori ha’u to’o elevadór ne’e para garante duni katak ha’u sai ona husi Timor-Leste, nia hateten ho emosionadu no hanoin loos Timor-Leste”.
Agradese Povu Timor-Leste
Alende ne’e, Xefe Estadu mós agradese no kongratula povu Timor-Leste ne’ebé hatudu maturidade di’ak hodi kontribui ba susesu durante loron tolu Sua Santidade vizita Timor-Leste.
“Agradese ba povu, tanba kontribui maka’as loos mak halo susesu papa nia vizita ne’e, ba joven sira imi matenek los, imi kontribui duni ba pás, tenke mantein hanesan ne’e ba oin,” Horta tenik.
Nune’e nia mós agradese ba Governu liuliu Primeiru-Ministru Kay Rala Xanana Gusmão ne’ebé hamutuk ho nia membru Governu sira organiza eventu boot ne’e la’o to’o susesu.
Jornalista: Hortencio Sanchez
Editór: Florencio Miranda Ximenes
