DILI, 18 setembru 2024 (TATOLI)—Primeiru-Ministru (PM), Kay Rala Xanana Gusmão, hamutuk ho delegasaun desloka kuarta ne’e tuku 09:00 bá Nova Iorke, Estadu Unidu Amérika (EUA), hodi partisipa iha Asembleia Jerál Organizasaun Nasaun Unida (ONU) ba dala-79, ne’ebé sei realiza iha loron 22 to’o 27 setembru 2024 inklui partisipa ajenda seluk.
Sesaun Assembleia Jerál Nasaun Unidas (AGNU, sígla portugés) ne’e ho tema ‘Labele husik ema ida iha kotuk: hamutuk iha asaun ba progresu dame, dezenvolvimentu sustentável no dignidade umana bá jerasaun foun iha futuru’.
Delegasaun Timor-Leste inklui Ministru Negósiu Estranjeiru no Kooperasaun, Bendito dos Santos Freitas, Ministra Saúde, Elia dos Reis Amaral, Vise-Ministra Asuntu ASEAN, Milena Rangel no Reprezentante Permanente Timor-Leste ONU nian, Dionísio da Costa Babo Soares inklui delegadu ofisiál sira.
“Simeira iha tinan ida-ne’e sei halibur líder sira mai husi mundu tomak ho sesaun oin-oin no sei fó oportunidade ba líder hotu inklui Xanana Gusmão atubele halo promosaun ba interrese nasionál Timor-Leste nian no halo interasaun ho líder globál sira seluk,” refere nota ne’ebé Agência Tatoli asesu, iha tersa ne’e.
Iha loron 22 setembru, Primeiru-Ministru sei hamutuk ho Xefe Estadu sira ne’ebé mak halibur hamutuk iha Simeira Kona-ba futuru, sei halo intervensaun nu’udár sesaun ida-ne’ebé foin realiza ba dala-uluk husi ONU atu determina sistema internasionál hodi responde ba nesesidade ne’ebé di’ak liu ba jerasaun ohin loron no futuru.
Iha loron 23 setembru, Xanana sei partisipa iha Simeira Líder Aliansa Estadu Illa Kiik Sira (AOSIS, sigla portugés) no iha loron hanesan, sei lansa ofisialmente livru kona-ba ‘Hau-nia Tasi, Hau-nia Timor’. Eventu Ekonomia Azul Timor-Leste ne’ebé importante ne’e sei destaka Timor-Leste ninia planu jestaun oseanu sustentável.
Eventu ne’e sei partisipa espesiál husi Oseanográfu mundiál, Sylvia Earle, ne’ebé sei fahe ninia matenek no no koñesimentu. Sei iha diskusaun interresante kona-ba signifikativa biodiversidade mariña Timor-Leste nian ho nia esforsu dedikadu husi país nian atu konserva ambiente mariñu.
Iha loron 24 setembru, Primeiru-Ministru iha ajenda ofisiál atu hala’o enkontru ho Sekretáriu Jenerál ONU, António Guterres, ne’ebé foin hala’o vizita mai Timor-Leste iha fulan kotuk no hola parte iha komemorasaun tinan-25 loron Konsulta Populár (28 agostu 1999).
Iha loron 25 setembru, Xefe Governu sei hato’o palestra públika iha Universidade Colombia, ne’ebé sei partisipa husi universitáriu sira, hodi ko’alia kona-ba konflitu no pás hanesan prekursu sira ba dezenvolvimentu sustentável.
Nune’e, iha loron 26 setembru, Xanana ne’ebé hanesan mós figura proeminente ba g7+ sei partisipa no hato’o intervensaun iha simeira altu nível g7+ intulada ‘Pás iha mundu no Pás iha nasaun sira g7+ – Partilla dezafiu no Soluasun’.
Notísia relevante: PR Horta desloka bá Nova Iorke partisipa Asembleia Jerál ONU dala-78
Xefe Governu mós sei partisipa iha eventu altu nível paralelu rua, ida sei diskute kestaun prinsipál saúde públika ne’ebé konstitui dezafiu globál ida, nomeadamente kona-ba Rezisténsia Antimikrobiana (RAM) no ida seluk kona-ba ameasa ezistensiál reprezentada ba subida nível tasi nian.
Aleinde eventu sira altu nível ne’e, Primeiru-Ministru sei partisipa mós iha resepsaun ofisiál sira no reuniaun bilaterál relasionada ho Xefe Estadu no Governu iha marjen 79ª sesaun Asembleia Jerál ONU nian.
Asembleia Jerál ONU hanesan órgaun importante ida husi órgaun neen ne’ebé kompoin ONU no halibur Estadu membru sira hamutuk 193. Eventu ne’e realiza anualmente iha sede ONU iha Nova Iorke no konta ho prezensa Xefe Estadu sira, Xefe Governu no diplomata hosi mundu tomak.
Desde Timor-Leste hetan admisaun hanesan membru ONU nian ba dala-191, iha setembru 2002, nasaun ne’e partisipa ativamente iha Asembleia Jerál ONU, promove ninia interrese sira no kontribui ba debate globál sira kona-ba kestaun pás, seguransa no dezenvolvimentu.
Jornalista : Osória Marques
Editora : Julia Chatarina
