DILI, 20 setembru 2024 (TATOLI) – Event2u, ohin, lansa Video clip Calema “Amar Pela Metade” iha Timor-Leste.
Produser Video clip, Luis Simoes sente kontente tanba ohin loron bele halo ona lansamentu Video clip Calema nian ho títulu Amar Pela Metade iha Timor leste, tanba video clip ida-ne’e ema seidauk haree maibé Timor-Leste mak dahuluk halo lasamentu depoizde Portugal”, Luis Simoes informa ba TATOLI iha Timor Plaza, ohin.
Nia dehan, video clip ida-ne’e Calema sira grava iha Timor-Leste bainhira sira mai partisipa iha TasiFest ne’ebé grava hamutuk ho ekipa husi timoroan sira.
“Finalmente ohin ita bele iha rezultadu ne’ebé mak di’ak no sira transmite no hatudu saida mak di’ak husi timór”, nia esplika.
Nia informa, video clip antes prodús, iha tempu ne’ebé limitadu tebes maibé ho esforsu Event2u ho ekipa sira bele realiza duni.
“Video clip ne’e halo iha fulan-Maiu depois ita edita tanba video ida-ne’e ita grava iha Timor- Leste hanesan iha munisípiu Ainaro, Dili no Aileu no ohin loron bele lansa video ne’e rasik”, nia haktuir.
Nia relata, ema ne’ebé mak envolve iha video clip ne’e hamutuk 40, husi ne’e cameraman no realizadór husi Portugal, produsaun husi Event2u no restu ne’e mesak timoroan.
Iha fatin hanesan, Diretór Jerál Turizmu, António da Silva, hateten Even2u halo ona lansamentu ba video clip Calema nian.
“Calema momentu ne’eba mai iha ne’e halo kolaborasaun ho Ministériu Turizmu no Ambiente hodi haree kona-ba produsaun video clip ne’ebé mak ohin ita asiste hamutuk, entaun ho video ne’ebé mak sira hasai paizajen ho tais ne’ebé mak lori ba mundu tomak bele haree ita-nia rai ida -ne’e hodi dada turista sira seluk bele vizita ita-nia rain”, António subliña.
Main Dancer, Daniela das Quintas sente orgullu tebes hanesan joven timoroan ne’ebé inklina aan iha Video Calema nian ida-ne’e.
“Ha’u sente orgullu ba video clip ida-ne’e tanba sira hili ha’u hanesan main dancer iha sira-nia video, entaun hanesan timoroan ha’u kontente, tanba aumenta ha’u-nia esperiénsia iha entertaiment ida-ne’e, ho nune’e ha’u husu ba joven sira, karik iha iha talentu labele moe atu hatudu, maibé barani hatudu iha media sosiál sira ne’ebé mak iha no hatudu buat ne’ebé mak pozitivu ba ita-nia moris”, Quintas konklui.
Jornalista : Felicidade Ximenes
Editór : Zezito Silva
