NOVA IORKE, 24 setembru 2024 (TATOLI)- Primeiru-Ministru (PM), Kay Rala Xanana Gusmão, hasoru-malu ho Jean-Pierre Lacroix nu’udár Sub-Sekretáriu-Jerál bá Operasaun Pás Fransa nian (Grupu Europa Osidentál no sira seluk) hodi fahe esperiénsia ba malu kona-ba pás iha rai hirak ne’ebé sei kontinua sofre ba funu.
Líder na’in-rua ne’e hasoru-malu iha ámbitu Simeira Kona-ba Futuru iha Sesaun ba dala-79 Assembleia Jerál Nasaun Unidas (AGNU,sígla portugés) ne’ebé realiza iha loron 24 Setembru 2024, iha sede ONU nian.
Xefe Governu Xanana Gusmão hanesan mós Personalidade Eminente g7+ agradese tanba bele rona no fahe esperiénsia luta libertasaun Timor-Leste nian to’o halibur grupu g7+ ba Jean-Pierre Lacroix nu’udár pessoa ida ne’ebé luta no servisu makas kona-ba operasaun dame nian.
Jean-Pierre Lacroix moris iha 2 Maiu 1960 no frekuenta estudu ba lisensiatura sira husi Institutu ekonomia nian.
Lacroix asume pozisaun ne’ebé iha esperiénsia polítika no diplomátika liu tinan 25 ho foku ba organizasaun multilaterál sira no ba programa sira Organizasaun Nasaun Unidas nian.
Lacroix serbisu husi tinan 2014 to’o 2017 hanesan Diretór ba Nasaun Unidas, Organizasaun Internasionál sira, Direitu Umanu no Frankofonia iha Ministériu Negósiu Estranjeiru Fransa nian.
Ninia nomeasaun anteriór sira inklui Embaixadór Fransa nian iha Suésia, hanesan Xefe Protokolu Fransa nian, Adjuntu Reprezentante Permanente iha Misaun Permanente Fransa nian iha Nasaun Unidas iha Nova Iorke, Adjuntu Xefe Misaun nian iha Embaixada Fransa nian iha Praga no Primeiru Sekretáriu hafoin Segundu Konselleiru iha Embaixada Fransa nian iha Washington. Nia mós serbisu nu’udár Assesór iha Gabinete Primeiru-Ministru Fransa nian.
Iha okaziaun ne’e, Xefe Governu Xanana Gusmão hasoru-malu mós ho Rabai Moshe Klein hosi Community JUDAICO (JEWISH) iha Nova Iorke hodi troka impresaun kona-bá kestaun ne’ebé mundu hasoru iha aspeitu oioin.
Notísia relevante:PM Xanana inaugura edifísiu g7+ iha Nova Iorke
Jornalista: Hortencio Sanchez
Editór: Florencio Miranda Ximenes
