DILI, 01 outubru 2024 (TATOLI) – Prezidente Sentru Lojístika Nasionál (CLN), António de Araujo Soares, dehan CLN, iha fulan ida-ne’e, sei halo intervensaun foos ba Munisípiu Manatutu, Aileu, Baucau no Dili.
“Agora daudaun ami prepara hela atu halo intervensaun foos ba munisípiu Manatutu, Aileu, Baucau no Dili”, António de Araujo Soares dehan ba TATOLI via telefone, ohin.
António hateten, intervensaun ba munisípiu haat ne’e haree ba populasaun sira, ezemplu; hanesan Dili ema barak, entaun Governu halo intervensuan foos tonelada 100-resin.
“Agora munisípiu haat ne’e ita haree ba populasaun, ezemplu; iha Dili populasaun barak, ita ba halo intervensaun ho foos tonelada 100-resin, nune’e Baucau ita ba ho foos 150 tonelada, depois Aileu ita hare popualsaun ladún, ita la to’o 100 tonelada, nune’e Manatutu ita haree ema iha natar barak, entaun la to’o 85 tonelada”, nia esplika.
Nia informa, meadu outubru sei halo uluk intervensaun ba Manatutu, Aileu depois ikus mak Baucau ho Dili maibé Dili sei halo intervensaun ba ema sira ne’ebé mak hela dook husi sidade hanesan Metinaru.
Antes ne’e, Governu halo ona intervensaun foos ba Munisípiu Dili-Ataúro, RAEOA, Ermera, Liquiça, Lautem, Ainaro, Viqueque, Covalima no Manufahi.
Jornalista : Felicidade Ximenes
Editór : Zezito Silva
