DILI, 02 outubru 2024 (TATOLI)–Governu liuhusi reuniaun ordinária Konsellu Ministru (KM), kuarta ne’e, nomea atuál Vise-Prezidente Komisaun Ezekutiva ba asuntu Sistema Bee, Saneamentu no Drainajen, Gustavo da Cruz sai Prezidente Konsellu Administrasaun Bee Timor-Leste, Empreza Públika (BTL, E.P).
“Konsellu Ministru deside hasai Carlos Peloi dos Reis husi kargu Prezidente Konsellu Administrasaun Empreza Públika Bee Timor-Leste, no liuhusi rezolusaun Governu aprova nomeasaun ba Gustavo da Cruz nu’udar nia susesór, ba períodu tinan-haat,” referidu nota ne’ebé Agência Tatoli asesu hafoin reuniaun ezekutivu, iha Palásiu Governu.
Notísia relevante : Governu nomea Carlos Peloi sai Prezidente Konsellu Administrasaun BTL,E.P
Carlos Peloi hetan nomeasaun asume knaar hanesan Prezidente Konsellu Administrasaun BTL, E.P iha loron 06 janeiru 2021.
Nune’e, Gustavo da Cruz sei asume knaar foun hahú husi loron 01 novembru 2024.
Antes ne’e, Gustavo da Cruz nu’udar Diretór Jerál Água no Saneamentu iha Servisu Água no Saneamentu no sai Diretór Jerál iha Diresaun Jerál Água no Saneamentu (DGAS, sigla portugés) ne’ebé tutela ba Ministériu Obra Públika (MOP).
Governu hola inisistiva atu transforma Diresaun Jerál Água no Saneamentu (DGAS, sigla portugés) ba Empreza Públika (BTL, E.P) ho hanoin ida atu hasa’e prestasaun servisu no atendimentu ba konsumidór bee-moos iha Timor-Leste.
Aleinde ne’e, estabelese mós identidade Reguladór Água no Saneamentu no dekretu-lei estabelese kritériu ba kontrolu kualidade bee hodi bele uza ba konsumu umanu.
Dekretu-Lei iha ártigu 15, fó dalan ba MOP atu estabelese komisaun instaladora, maibé komisaun refere sei funsiona hafoin Prezidente Repúblika promulga dekretu-lei.
Komisaun instaladora ne’e prepara regulamentu hotu hodi iha janeiru 2021, ne’ebé momentu ne’ebá DGAS opera ona hanesan empreza estatál.
Jornalista : Osória Marques
Editora : Julia Chatarina
