DILI, 3 Outubru 2024 (TATOLI) – Reprezentante Empreza PT Garam husi Indonézia, Eko Salaudin, dehan empreza ne’e identifika ona fatin potensiál tolu ba produsaun masin iha Timor-Leste.
hala’o enkontru ho Ministériu Komérsiu no Indústria hodi aprezenta dadus kona-ba PT Garam identifika ona fatin potensiál tolu ba produsaun masin iha Timor-Leste.
“Ami halo levantamentu ida hodi identifika masin ninia potensiál iha Timor-Leste, liuliu iha Manatutu Suco Ma’abat, iha Oé-Cusse Lagoa Maesmone no iha Lagoa Maubara Liquiçá, ne’ebé iha rezerva masin ne’ebé ho potensiál aas tebes”, Empreza PT Garam husi Indonézia Eko Salaudin, informa ba jornalista sira hafoin reune ho Ministériu Komérsiu no Indústria iha salaun MCI Bebora, ohin.
Nia relembra, iha tinan 2014, PT Garam kolabora ho Governu Timor-Leste iha dezenvolvimentu indústria produsaun masin iha Ulmera, Munisípiu Liquiçá.
“Bainhira atu halo identifikasaun ba fatin sira-ne’e, iha ona asinatura memorandu entendimentu ida ho ministériu supervizór iha fulan-Juñu liu ba”, nia esplika.
Iha fatin hanesan, Diretór Jerál Indústria iha Ministériu Komérsiu Indústria, Martins Magno, hateten rezultadu ne’ebé aprezenta husi PT Garam sei sai hanesan referénsia ida ba MCI, ho hanoin atu kria sentru produsaun masin nian ne’ebé maka marka ona ba tinan oin.
“Ami iha planu atu estabelese sentru produsaun masin iha Oe-Cusse 2025, tanba tuir rezultadu peskiza sei prodús tonelada 700 kada tinan. Ekipa tékniku rekolla ona dadus no etapa tuir mai sei submete ba reuniaun Konsellu Ministru hodi diskute no define valór orsamentu investimentu nian”, Martins informa.
Nia esplika, PT Garam hala’o de’it ninia kna’ar nu’udar konsultór, maibé investimentu ne’e sei sai responsabilidade husi ministériu supervizór sira.
“Ba fatin masin potensiál rua iha Maubara no Ma’abat, ita sei halo tuir faze tanba limitasaun orsamentál”, nia konklui.
Jornalista : Felicidade Ximenes
Editór : Zezito Silva
