DILI, 05 outubru 2024 (TATOLI)—Ministériu Finansa realiza atividade desportiva ho modalidade hanesan futebol salaun (futsal) Volleyball ba feto no mane hodi komemora loron aniversáriu Ministériu Finansa (MF) ba dala-23, iha Kampu Futsal, Bebora-Dili, ohin.
“Ha’u agradese ba ekipa Komisaun Organizadora MF ne’ebé halo esforsu hodi ohin bele realiza ona eventu MF Cup ba dahuluk iha tinan 2024. Realizasaun eventu desportiva MF Cup ida ne’e atu komemora loron aniversáriu MF ba dala rua nulu resin tolu (23) ne’ebé monu iha loron 22 fulan Agostu,” Ministra Finansa, Santina José Rodrigues F. Viegas Cardoso, informa bainhira halo abertura ba iha Kampu Futsal, Bebora, ohin.
Objetivu husi jogu desportiva ho modalidade futsál no Volleyball ne’e, tuir Ministra, “Atu promove ezersísiu fíziku ba ita ema nia saúde pesoál, hametin amizade no relasaun entre servidór Estadu sira, instituisaun parseiru MF nian. Aliende atividade desportiva realizasaun jogu ida-ne’e nu’udar meiu ida atu promove talentu atleta sira-nian liuhusi kompetisaun ida justu, fraternidade no animativu”.
Nia dehan, iha Programa IX Governu nian, desportu hanesan maneira ne’ebé di’ak liu atu forma ho adekuadu karakter atleta sira-nian no haburas valór kooperasaun, amizade no servisu iha ekipa, enkuantu hadi’a kondisaun fíziku sidadaun sira-nian, mak investe iha dezenvolvimentu desportu nian. Desportu maka parte krusiál ida iha foin-sa’e sira-nia moris, envolve sira iha relasaun barak liután no di’ak liután asuntu sosiál sira no promove diálogu, toleránsia, étika, demokrasia, kompetisaun saudável no, hanesan mos ho hasa’e abilidade lideransa nian.
“Ha’u agradese ba ekipa sira no mós Jogadór feto no mane husi modalidade desportiva futsal no Volleyball neʼebé mai husi liñas ministeriais, ajénsia Autonomu, no Parseiru estratéjiku MF nian hotu iha TL neʼebé rejista no hola parte mós ona iha eventu ida-ne’e. Ha’u he’in katak imi-nia partisipasaun sei halo moris no anima liután eventu MF Cup ida ne’e,” nia informa.
Iha okazisaun ne’e, ministra aproveita mós hodi hato’o agradese ba ekipa KO parseiru MF nian hodi organiza jogu rua hanesan husi Juventude Hadomi desportu (JHD) no Federasaun Volleyball Timor-Leste-FVTL, neʼebé fasilita no apoiu ona ekipa komisaun organizadora MF hodi realiza eventu ida-ne’e.
“Ha’u husu Ekipa KO sira hotu nia kontribuisaun atu nafatin kordena ba malu hodi organiza no jere atividade ida ne’e atu la’o ho di’ak to’o rohan, no ba ekipa jogadór hotu ha’u husu ba ita hotu atu joga ho di’ak, konfidente, respeita malu, disiplina, profisionál no hatudu imi-nia talent ka skills desportiva nian. Labele haree ba valór prémiu ne’ebé oferese, maibé haree ba oportunidade atu bele haluan no hakesi imi-nia relasaun ema nian,” nia fó hanoin.
Iha fatin hanesan, Koorenadór MF CUP, Joanico Pinto, hateten komisaun organizadora Finansas Cup estabelese ho baze ba despaxu Ministra Finansa no.39/GMdF/IX/2024-09, 19 Setembru 2024, ne’ebé nomeia Komisáriu Autoridade Aduaneiro hanesan Kordenadór Jerál, Integra Diresaun nasionál neen iha estrutura DGSK hanesan Diresaun Nasionál Aprovizionamentu no Jestaun Kontratu, Diresaun Nasionál Administrasaun no Jestaun Arkivu, Diresaun Nasionál Rekursu Umanu, Diresaun Nasionál Finansa, Diresaun Nasionál Lojístika Manutensaun no Projetu, Diresaun Nasionál Planeamentu Orsamentu no Avaliasaun Desempeñu, neʼebé define kedas ida-idak ninia tarefa.
“Husi Modalidade Jogu rua ne’e Komisaun Organizadora sei Atribuisaun prémiu ho tipu rua mak hanesan Primeiru Lugar osan, taxa no medalla, Segundo Lugar osan, Taxa no Medalla, Terseiru Lugar Osan no taxa no Kuartu Lugar Osan. Ba Individuál sei atribui osan ba Melhor Jogadór, Melhor Markador, Melhor Guarda-Rede, Melhor Spiker, Melhor Toser, Melhor Libeiro no Melhor Jogador,” Joanico Pinto afirma.
Vise-Primeiru-Ministru no Ministru Koordenadór ba Asuntu Sosiál, Mariano Asanami Sabino husu jogadór sira tantu feto no mane atu joga didi’ak joga ho disiplina nune’e jogu ida-ne’e bele to’o rohan.
“Jogu ida ne’e fó lisaun ida ba ita atu oinsá ekipa ne’e bele servisu hamutuk, tanba ne’e ha’u husu ba ita-boot sira ne’ebé mak atu joga tenke ho did’iak, joga ho disiplina, nune’e bele la’o to’o rohan,” Mariano Asanami Sabino apela.
Jornalista : Felicidade Ximenes
Editór: Rafael Ximenes de A. Belo
