OÉ-CUSSE, 05 outubru 2024 (TATOLI)–Sekretaria Rejionál ba Asuntu Saúde, hamutuk Servisu Edukasaun Rejiaun Administrativa Espesiál Oé-Cusse Ambeno (RAEOA), sesta horisehik, lansa vasina Vírus Papiloma Umanu (HPV, sigla inglés) iha Eskola Báziku Filiál (EBF) Banaefmanat, suku Ban-Afi, sub-rejiaun Nítibe, hodi prevene kankru serviks ba labarik feto sira.
Sekretáriu Rejionál ba Asuntu Saúde, Luís de Jesus Neno, hateten kona-ba vasinasaun HPV ne’e atu hasa’e imunidade no prevene moras kankru serviks ho ninia alvu mak ba estudante feto sira ho idade 11 to’o 14.
“Labarik sira-ne’e atu hetan vasinasaun ne’e idade 11 to’o 14 no alvu ba Oé-Cusse hamutuk na’in-4.117, ne’ebé eziste iha eskola hotu-hotu no aldeia no suku. Espera katak, hahú ohin ba oin, kampaña sei akontese iha eskola hotu no fasilidade saúde sira, nune’e data estimativa ne’ebé fó mai RAEOA, ita-bele akumula ema sira-ne’e tenke mai hotu hetan vasinasaun”, Luís Neno hateteten iha iha ninia diskursu iha EBF Banaefmanat.
Notísia Relevante: Profisionál saúde na’in-30 partisipa formasaun molok implementa vasina HPV
Nia informa, liuhusi kampaña vasinasaun ne’e bele proteje-aan no moris saudavel, tan ne’e nia apela ba komunidade no entidade nia kontribuisaun atu apoia kampaña ne’e ho susesu.
“Komunidade bainhira ita iha família no oan feto idade 11to’o 14 bele hakbesik mai iha fasilidade saúde no eskola sira atu bele hetan vasinasaun, tanba pesoál saúde sei tama eskola no sai eskola iha territóriu Oé-Cusse. Ita husu entidade tomak atu apoia, nune’e ita-nia oan sira bele hetan hotu vasinasaun,” nia apela.
Notísia Relevante: Prevene kankru serviks, saúde Oé-Cusse introdús impaktu vasina HPV iha Pante Makasar
Diretór Edukasaun Oé-Cusse, Vincencio Cono, hateten nia parte garante katak eskola hotu-hotu sei partisipa másima no husu ba profesór no estudante sira bele koopera, nune’e bele simu vasina.
“Estudante sira lalika rona, inan-aman sira-ne’ebé lori lia-bosok. Pofesór sira persiza esplika beibeik, atu kampaña ne’e labele iha dezafiu. Tanba objetivu husi vasinasaun ne’e mak atu proteje alin feto sira, tanba husi idade produtiva hahú kedas atu proteje to’o aban bainrua hetan saúde di’ak no moris saudavel. Tan ne’e, husu ba dirijente eskola ne’ebé prezente iha ne’e, orienta hela ba eskola sira, tanba alvu ne’e ba estudante klase V to’o klase IX,” nia apela.
Notísia Relevante: Vasina HPV prevene kankru serviks
Tuir nia, iha Servisu Saúde Oé-Cusse, rejista ona kazu moras hada’et husi HPV hamutuk 22 no kazu HIV/Sida hamutuk 73.
Jornalista : Abílio Elo Nini
Editór : Cancio Ximenes
