Ekipa ME sei halo re-identifikasaun urjente ba lista profesór ho idade reforma
DILI, 09 outubru 2024 (TATOLI)–Ekipa husi Ministériu Edukasaun (ME) sei halo re-identifikasaun urjente ba lista profesór ho idade reforma.
Kondisaun ne’e relasiona ho Parlamentu Nasionál nia aprovasaun proposta-lei númeru 11VI(1a) kona-ba autorizasaun lejizlativa iha matéria fixasaun limite idade ba relasaun servisu funsionáriu públiku no ajente administrativu iha finál globál, ho votu afavór 37, kontra 0 no abstensaun tolu.
“Ita tenke halo urjente ba re-identifikasaun ba lista profesór ho idade reforma. Ita presiza haree filafali dadus, nune’e bele hatene profesór husi idade 65 ba leten ne’e iha na’in hira. Tanba Parlamentu Nasionál aprova ona, ne’e presiza duni haree,” Diretora Nasionál Rekursu Umanu, iha ME, Anita Tavares, hato’o ba Agência Tatoli iha ninia knaar fatin, Vila-Verde, kuarta ne’e.
Notísia relevante : PN aprova proposta-lei reforma obrigatóriu ba FP ho idade 65
Profesór hamutuk 3.868 maka daudaun ne’e tama ona iha idade idozu, invalidéz no sobrevivénsia maibé kontinua hanorin estudante sira iha territóriu.
“Ekipa husi Ministériu Edukasaun identifika hotu ona no rekolla ona dadus manorin invalidéz, velise no sobrevivénsia iha territóriu mak hamutuk 3.868, ne’ebé husi númeru ne’e kompostu husi feto 1.248 no mane 2.620,” nia tenik.
Profesór sira ne’ebé maka ho kondisaun sobrevivénsia hamutuk 827, idozu 2.746 no invalidéz 295, fahe iha munisípiu Aileu iha 148, Ainaro 291, Baucau 495, Bobonaro 320, Covalima 292, Dili 717, Ermera 229, Lautém 261, Liquiça 182, Manatuto 168, Manufahi 314, Rejiaun Administrativa Oé-cusse Ambeno (RAEOA) 111, no Viqueque 340.
“Ida-ne’e importante no ita bele rezolve ona problema kuandu iha ona dadus, nune’e prosesu rekrutamentu profesór ne’e bele koloka hikas hodi atende ita-nia estudante sira. Dadus ida-ne’e importante tanba eskola sira presiza profesór ne’ebé mak saúde di’ak hodi hala’o prosesu ensinu aprendizajen, tanba durante ne’e profesór barak mak ho kondisaun saúde la saudável,” Diretora katak.
Tuir lei númeru 6/2012 no dekretu-lei númeru 23/2012, funsionáru ME iha rejime jerál ba funsionáriu administrasaun no rejime espesiál ba profesór sira.
Jornalista : Osória Marques
Editora : Julia Chatarina
