Top

CAC submete ona rezultadu buska domisiliáriu RG ba Ministériu Públiku

Komisáriu Komisaun Anti-Korrupasaun (CAC, sigla portugés) Rui dos Santo koalia jornalista sira iha nia kna'ar fatin Farol, kuarta ohin. foto Natalino Costa.

DILI, 10 outubru 2024 (TATOLI) – Komisáriu Komisaun Anti-Korrupasaun (CAC, sigla portugés), Rui Pereira dos Santos, hateten CAC konklui ona prosesu buska domisiliariu hasoru RG ne’ebé suspeita ba kazu fó malu projetu iha Ministériu Agrikultura Peska Pekuaria no Floresta (MAPPF) foin lalais ne’e.

“CAC implementa orden Tribunál nian kona-ba buska ne’e katak rekolla dokumentu, entaun rekolla hotu ona, ita haruka ona ba Ministériu Públiku. Maibé sé karik buat ruma falta, ita presiza haruka pedidu ba fali Tribunál para hetan autorizasaun husi Tribunál liuliu despaisu husi Juiz sira atu ita kompleta tán informasaun sira ne’e. Tanba investigasaun kazu kriminál ne’e kazu ne’e espesiál, tanba ne’e mak nia prosesu mós espesiál, tanba  ne’e mak ita tenke halo tratamentu ho kuidadu”, Rui Pereira hateten ba jornalista sira iha nia kna’ar fatin Farol, kinta, ohin.

Nia dehan, hanesan Komisaun Anti-Korrupsaun iha poder ba investigasaun ninian no kompleta de’it investigasaun hodi submete ba Ministériu Públiku hafoin ministériu prepara akuzasaun hodi lori ba Tribunál.

“Ba to’o Tribunál mak ita meritismu Juiz sira iha Tribunál Dili ka Tribunál fatin seluk mak iha poder hodi halo julgamentu ba prosesu sira ne’ebé maka iha. Maibé CAC halo tratamentu ho kuidadu. Ita tenke kumpre ba Kódigu Prosesu Penál, depois ita tenke respeita ba dignidade maluk sira ne’ebé mak ita bolu mai iha ne’e”, katak.

Rui hateten, CAC kontinua kaer ba prinsípiu prezunsaun inosénsia hodi respeita dignidade ema ida nia maske nia estatutu ne’e sai ona suspeitu ka arguidu hodi CAC lori mai halo investigasaun.

“Tantu sira ne’e, estatutu ne’e atu sai sasin de’it ka atu sai arguidu ona, ita nafatin respeita sira, tanba prinsípiu prezunsaun inosénsia”, nia konklui.

Nia afirma, presiza tau aas ema-nia dignidade, biar nia sai ona suspeitu ka arguidu, bainhira to’o ona Tribunál no Tribunál mak iha kompétensia atu dehan nia ne’e sala ka los, ne’e só Tribunal nia desizaun.

Notísia relevante : CAC buska ba rezidénsia RG suspeita fó projetu ba malu iha MAPPF

Jornalista: Natalino Costa

 Editór : Zezito Silva

Publisidade

Leave a Reply

Latest Post

error: Content is protected !!