PAM Bobonaro husu labele okupa beibeik propriedade Estadu
BOBONARO, 14 outubru 2024 (TATOLI) – Prezidente Autoridade Munisípiu Bobonaro, Alexandrino Pires, husu ba xefe suku sira atu labele autoriza komunidade okupa beibeik propriedade Estadu hanesan uma no rai ne’ebé Estadu ho Governu Portugés no Indonezía husik hafoin Timor-Leste ukun-an.
Nia parte ko’alia ona ho Ministru Justisa, Sérgio Hornai no Diretór Delegasaun Territoriál Terra no Propriedade Munisípiu Bobonaro, atu halo levantamentu dadus nune’e bele identifika rai no uma Estadu ne’ebé abandonadu nune’e ba futuru bele jere no administra.
Asaun ne’e hanesan faze preparasaun ida atu hasoru eleisaun kámara munisipál, nune’e ba futuru autoridade munisípiu Bobonaro bele regulariza sidadaun ne’ebé okupa proprietáriu estadu tenke selu taxa kada fulan.
Notísia relevante: DTP Bobonaro rejista arrendatáriu 94 selu taxa ativu
“Ne’e ita la’ós fuan aat ba malu, maibé ita ba kámara munisípiu ida-ne’e tenke akumula hotu, sé lae osan ita foti husi ne’ebé, ne’ebé ha’u husu xefe suku sira labele autoriza ema halo beibeik konstrusaun iha rai Estadu, tanba aban bainrua ita atu muda ema ho kustu ne’ebé boot la halimar, di’akliu para ona,” nia hateten iha salaun Maria-Tapo.
Tuir dadus DTP Munisípiu Bobonaro tinan 2023, iha sidadaun Timoroan no estranjeiru ne’ebé okupa rai no uma estAdu hamutuk na’in 100-resin mak kumpre devÉr selu taxa arrendamentu.
Enkuantu hahú husi fulan-janeiru to’o maiu tinan 2024 ne’e, DTP munisípiu Bobonaro konsege halibur reseita hamutuk rihun $20,923 husi arrendatáriu na’in-97 ne’ebé utiliza uma no rai estadu ba halo atividade komérsiu no rezidénsia.
Notísia relevante: MJ orienta DTP Bobonaro identifika rai no uma Estadu
Jornalista: Sérgio da Cruz
Editór: Evaristo Soares Martins
