DILI, 16 outubru 2024 (TATOLI)–Mate-isin maktoban Saudozu Koronél António Soares da Silva “Maucalo” ne’ebé hakotu iis iha sábadu (12 outubru 2024) iha Malázia, tuir planu, sei to’o iha Aeroportu Internasionál Prezidente Nicolau Lobato, Comoro, Dili, Timor-Leste, iha tuku 13h30.
Notísia Relevante: Koronel Maucalo hakotu iis hafoin halo tratamentu saúde iha Malázia
“Ohin, kuarta 16 outubru 2024, mate-isin maktoban saudozu Koronél António Soares da Silva “Maucalo” foin sai husi Malázia no kalan ida sei iha Bali-Indonézia, Iha aban, kinta 17 outubru 2024, mate-isin sei sai husi Bali iha tuku 1oh30 dadeersan no sei to’o iha Aeropostu Internaasionál Prezidente Nicolau Lobato iha tuku 13h3o lorokraik,” Kordenadór Komisaun Organizadora, Marciano Juvinal, hateten ba jornalista sita liuhusi konferénsia imprensa, iha Kintál Boot, kinta ne’e.
Tanba ne’e, nia dehan, komisaun organizadora konvida Uatulari-oan sira, Estadu no Governu, Veteranu sira, organizasaun sira, grupu, família, kolega no parente sira atu partisipa iha transladasaun ba mate-isin saudozu “Maucalo” husi Aeroportu Internasionál Preizidente Nicolau Lobato iha Comoro hodi lori ba matebian nia rezidénsia iha Kintál Boot, atu bele hatudu sentidu korajen ba família matebian.
Programa transladasaun ba mate-isin saudozu “Maucalo” iha kinta (17 outubru 2024) aban ne’e mak hanesan; Iha tuku 13h30 to’o iha tuku 14h00 lorokraik sei iha alas kortezia husi membru FALINTIL Forsa Defeza Timor-Leste (F-FDTL) no iha tuku 14h00 to’o 14h30 ne’e sei lori maktoban saudozu “Maucalo” nia mate-isin ba ninia rezidénsia iha Kitál Boot.
To’o iha matebian nia rezidénsia, iha tuku 14h30 to’o 10h00 ne’e, simu maktoban saudozu Koronél Maucalo nia mate-isin ho alas kortezia husi membru FALINTIL Forsa Defeza Timor-Leste.
Tuir planu, nia hateten, maktoban Saudozu Koronél António Soares da Silva “Maucalo” sei hakohi iha tersa (22 outubru 2024) iha Jardin dos Herois Metinaro ho misa requiem iha tuku 12h45-14h00 iha Kapela Falintil-Forsa Defesa Timor-Leste (F-FDTL).
Antes ba hakoi, iha dadeersan tuku 09h40 to’o 10h00 fó omenjaen ikus iha rezidénsia, iha tuku 10h30 to’o 10h45 sei fó omenajen ikus iha edifisiu Konsellu Kombatente Libertasaun Nasionál (CCLN), iha tuku 10h45-11h30 sei fó omenajen ikus iha Sede Comité Sentral Fretilin (CCF), iha tuku 11h30-12h45 omenajen ikus iha Falintil-Forsa Defesa Timor-Leste depois kontinua ba Metinaro.
“Iha prosesu funebre sei hamutuk ho restu mortal hamutuk ema na’in-neen (6) mak hanesan saudoza Etelvina Fernandes “Bidolimau” no oan na’in-neen (6) hanesan Abelita, Amelita no anjo kaduak , Sejuinha, Domingas (Biunju),” nia informa.
Nune’e, Komisaun organizadora ho familia nia naran hato’o agradesimentu ba ba entidade hotu husi Governu, familia no kolega sira-ne’ebé fó apoiu ideia no materiál ba familia saudozu António Soares da Silva “Maucalo” to’o ohin loron.
“Komisaun organizadora lori familia enlutada nia naran hato’o obrigadu uain ba parte hotu-hotu nia esforsu, apoiu no kontribuisaun durante ne’e tantu husi Governu Timor-Leste liuhusi Ministériu Asuntu Kombatente Libertasaun Nasionál no Embaixada Timor-Leste iha Malázia no Komisaun Kombatente Libertasaun Nasionál. Agradesei ba parte hotu ne’ebé ami la temi ida-idak nia esforsu no kontribuisaun liuhusi ideia, fízika no materiá ba prosesu hotu to’o mai ohin loron,” nia dehan.
Membru FALINTIL-Forsa Defeza Timor-Leste (F-FDTL), Koronél António Soares da Silva ‘Maucalo’ hakotu iis iha sábadu (12 outubru 2024) iha tuku 07h00 dadeersan, hafoin halo tratamentu saúde iha ospitál Malázia.
Jornalista : Jesuína Xavier
Editór : Cancio Ximenes
