PR Horta enkoraja jornalista timoroan kontinua serbisu ho profisionál
DILI, 16 outubru 2024 (TATOLI)—Prezidente Repúblika (PR), José Ramos Horta, enkoraja jornalista timoroan sira atu kontinua serbisu ho profisionál.
Xefe Estadu hato’o mensajen ne’e relasiona ho loron liberdade imprensa ne’ebé selebra iha 16 outubru kada tinan.
“Ba jornalista sira iha Timor, kontinua imi-nia serbisu, ha’u ko’alia nafatin ho Governu atu haree meiu oinsá ne’ebé di’ak, onestu, no transparente atu ajuda mídia nasionál hotu, inkluidu mídia sosiál, maibé mídia sosiál ne’ebé ita haree profisionál, jornál sira ne’ebé kleur ona halo sakrifísiu no ba televizaun sira inklui televizaun privadu. Ida-ne’e mak Governu bele hatudu nia kompromisu ba mídia hodi tau orsamentu ne’ebé di’ak ba mídia,” PR Horta hateten ba jornalista sira, iha Palásiu Prezidensiál, Bairru Pité, kuarta ne’e.
Notísia relevante : SEATOU ho Autoridade Polisiál halo atentadu sériu kontra Liberdade Imprensa
Xefe Estadu dehan, iha mundu oras ne’e jornalista barak husi ASEAN no Palestina mate iha funu no konflitu.
“Iha Timor sorte laiha funu iha liberdade imprensa, maibé husi ne’e, rai ida ne’ebé livre moris iha dame laran, hanoin ba jornalista sira iha mundu ne’ebé buka fó informasaun ba sosiadade,” nia tenik.
PR Horta katak, mate tanba dalaruma bomba ruma rebenta, dalaruma ema halo asasinatu ba sira, iha rai balun hanesan iha Mexico no Rúsia, ema buka jornalista tanba hakerek buat ne’ebé balun la gosta.
Nia esplika, la’ós de’it Governu, ezemplu jornalista mate iha Mexico ne’e la’ós Governu mak halakon vida, maibé grupu krime organizadu, tanba ne’e ba sira hotu hatudu solidariedade ba sira.
Horta reforsa, jornalista sira atu sai profisionál ne’e sempre iha meiu tanba hanesan edukasaun ida sei lori tempu, la’ós de’it ba eskola estudu jornalizmu, maibé presiza meiu atu sai profisionál di’ak.
“Meiu ne’e hanesan halo peskiza, investigasaun no meiu atu iha transporte, tanba ne’e mak ha’u hateten beibeik ba Governu, desde primeiru mandatu kedas buka apoia ba mídia, tanba ita-nia mídia hanesan serbisu públiku ida,” PR akresenta.
Jornalista : Osória Marques
Editora : Julia Chatarina
