DILI, 28 outubru 2024 (TATOLI)–Autoridade Munisipál Dili, União das Cidades Capitais de Língua Portuguesa (UCCLA) no Kâmara Munisipal de Lisboa lansa fatuk dahuluk ba konstrusaun edifisiu balkaun uniku ba AMD nian.
Notísia Relevante: AMD no UCCLA reforsa akordu kooperasaun
Inisiativa ida-ne’e hala’o liuhusi projetu “Parseria hodi Reforsa Governasaun Urbana, Inkluzaun Sosiál no Promosaun Empreendedorismu iha Dili, Timor-Leste”, ho finansiamentu União Europeia no kofinansiamentu husi Autoridade Munisipál Dili, no implementasaun hala’o husi parseiru é Autoridade Munisipál Dili (AMD), União das Cidades Capitais de Língua Portuguesa (UCCLA) no Câmara Municipal de Lisboa (CML).
Prezidente Autoridade Munisípiu Dili (AMD), Gregório Saldanha, hateten inisiativa ida ne’e dezenvolve liuhusi parseria ba reforsu governasaun urbana, inkluzaun sosial no promosaun ba emprendedorismu iha Dili, dezenvolver husi AMD, UCCLA no Kamara munisipal Lisboa finansia husi Uniaun Europeia no koGovernu timorense, ne’ebé krusial tebetebes atu fó espasu luan iha konsolidasaun servisu lokal sira prestadu ba AMD no lao tuir dalan ba prosesu desentralizasaun.
“Objetivu husi balkaun uniku ne’e atu uniformiza no armoniza serbisu sentrál munisipiu nian ba sidadaun hotu-hotu presta ba sidadaun, hanesan padronizasaun rede balkaun ne’ebé ba iha rekoñesimentu ba sidadaun. Rekualifikasaun edifisiu ne’e iha espasu Autoridade Munisipál Dili ho medida metru 100 kuadradu ne’ebé sei konklui iha fevereiru 2025,” Prezidente AMD, Gregório Saldanha, hateten iha nia diskursu iha lansamentu fatuk dahuluk edifísiu balkaun únika, iha Matadoru.
Autoridade munisipal ne’e hato’o agradesimentu ba entidade hotu-hotu ne’ebé envolve no kolabora iha projetu fízika no finaseiru atu hadi’a servisu AMD liuhusi balkaun úniku.
Nune’e mós, nia dehan, projetu ne’e mós promove formasaun no kapasitasaun funsionáriu AMD nian atu hadi’a prestasaun serbisu ba sidadaun sira munisipiu nian, nomós ho rekursu ba transformasaun dijitál.
Jornalista : Jesuína Xavier
Editór : Cancio Ximenes
