BOBONARO, 30 outubru 2024 (TATOLI) – Prezidente Autoridade Munisípiu Bobonaro, Alexandrino Pires, sei ko’alia ho Ministru Obra Públika (MOP), Samuel Marçal, atu tau prioridade iha orsamentu tinan fiskál 2025 hodi rezolve kondisaun estrada liga husi kapitál Maliana ba postu administrativu Cailaco no husi Lahomea liga ba postu administrativu Bobonaro ho Lolotoe.
Nia parte aprezenta ona kestaun ne’e ba Ministru Planeamentu no Imvestimentu, Gastão Francisco de Sousa, tanba kondisaun fíziku estrada hirak-ne’e kuaze aat totál.
Notísia relevante: Estrada iha Oe-leu haterus komunidade viajen Maliana-Bobonaro
“Depois finadu ami na’in-rua sei hasoru malu ho Ministru Obras Públika, atu fó importánsia no sériu ba ida-ne’e atu rezolve problema estrada husi Cailaco, depois husi Lahomea ba to’o Kolimau depois ba Loloto’e to’o Covalima,” Alexandrino Pires hateten iha reuniaun konsellu koordenasaun munisipál, iha salaun Maria-Tapo, kuarta ne’e.
Antes ne’e konsultan PT Wiratman JKC halo ona levantamentu dadus ba estrada husi diresaun Mai-Mali, suku Ritabou, postu administrativu Maliana ba to’o postu administrativu Cailaco.
Notísia relevante: MOP deside hadi’a dezeñu projetu manutensaun estrada Lahomea-Bobonaro
Jornalista: Sérgio da Cruz
Editór: Evaristo Soares Martins
