BOBONARO, 03 novembru 2024 (TATOLI) – Natar-na’in iha suku Tapo-Memo, sente kontente tanba iha segunda loron (28/10) ne’e, Ministru Agrikultura Pekuária, Peska no Floresta (MAPPF), Marcos da Cruz, asina ona kontratu ho Empreza ka PT Minarta Durahutama no empreza konsultór Supervizaun PT Caturbina Guna Persada no Jonito Ventura ho PT Miltimera Harapan husi nasaun Indonézia hodi halo konstrusaun ba irrigasaun Maliana II iha munisípiu Bobonaro.
Natar na’in aldeia Ulu-Atin, suku Tapo-Memo, Eduardo dos Santos, husu governu atu aselera prosesu tomak nune’e bele implementa iha tempu badak molok hakat ba tinan 2025.
Notisia relevante: MAPPF kontrata empreza husi Indonézia konstrui irrigasaun Maliana II
“Ha’u sente halo irrigasaun ne’e ami mós kontenti, tinan ida-ne’e nia laran tenke ser halo, tanba durante ne’e ema barak mak la halo natar, kanu bee-dalan aat, karik irrigasaun ne’e di’ak ema barak mak sai hotu halo natar, tanba uluk irrigasaun di’ak ne’e tinan ida ema halo natar dala rua, mas durante aat hela be ema la halo ida,” nia ko’alia iha Tapo-Memo, kuarta ne’e.
Xefe suku Tapo-Memo, Joaquim Baptista, orgullu no apresia tanba governu bele konsidera ona agrikultór sira-nia preokupasaun durante ne’e.
Líder komunitária ne’e, dehan, bainhira implementá projetu referida nia parte ho xefe aldeia sira no estrutura tomak prontu koopera ho governu no empreza internsionál ne’e hodi fó fó susesu ba obra ne’e.
“Maibé karik kompañia ne’e mai, iha servisu ki’ik ruma, ne’ebé maka kompañia lokál iha kbiit, ami husu governu atu rekomenda hela ba kompañia internasionál ne’e, servisu ki’ik fó sub ba kompañia ki’ik, atu nune’e pelumenus povu nia osan ida ne’e bele sirkula iha povu nia leet,” nia fó hanoin.
Xefe suku ne’e garante katak bainhira irrigasaun ne’e funsiona ho normál natar ne’ebé durante tinan barak abandona bele reativa hikas ba produsaun hare.
Nia komfirma, tuir dadus ne’ebé iha tempu Indonézia rai ne’ebé produtivu ba natar hamutuk ektare 1,840 no bainhira irrigasaun ne’e funsiona bele kobre natar ektare 2,430 mai husi suku Tapo-Memo, Odomau no suku Holsa.
“Ami haan hamutuk iha rai ida-ne’e, tanba ne’e terrenu produtivu dezde bei-ala sira kedas, entaun ita-nia irrigasaun ne’e di’ak agrikultór sira bele halo natar dala rua, ha’u garantia produsaun sei aumenta, karik iha motivasaun husi governu sentrál, povu sei badinas liután, ita sei la sosa hahán iha munisípiu sira seluk,” nia katak.
Iha fatin seluk, Prezidente Autoridade Munisípiu Bobonaro, Alexandrino Pires, hateten iha tempu badak ekipa MAPPF sei halo sosializasaun ba agrikultór sira no projetu ne’e sei implementa iha fulan dezembru tinan 2024.
“Obra ida-ne’e sei halo mós irrigasaun ki’ik-oan sira-ne’e, depois ne’e ministeriu mós apoia ona tratór ne’ebé rai hela iha Tunubibi, ida-ne’e bele redús ona problema ne’ebé ita-nia inan-aman sira enfrenta,” nia akresenta.
Enkuantu obra ne’e sei gasta orsamentu hamutuk $10,691,920.81, husi montante ne’e $9,886,820.81 ba konstrusaun fíziku no $895,100.00 ba konsultan.
Notísia relevante: Projetu irrigasaun Maliana II iha ona prosesu konkursu públiku
Jornalista: Sérgio da Cruz
Editór: Evaristo Soares Martins
