DILI, 07 novembru 2024 (TATOLI)– Primeiru-Ministru, Kay Rala Xanana Gusmão, kinta ne’e, iha Parlamentu Nasionál deklara ba deputadu sira katak, sei buka meiu hotu atu lori Greater Sunrise mai Timor-Leste.
Xefe Governu kontinua afirma nia pozisaun ne’e iha debate Orasamentu Jerál Estadu (OJE) 2025, iha faze jeneralidade ba loron da-ruak iha Uma-Fukun Parlamentu Nasionál ba deputadu na’in-65 no povu Timor-Leste hotu.
Notisia relevante:Woodside mantein nakloke ho opsaun sira ba projetu Greater Sunrise
“Karik ami la konsege realiza iha mandatu ida ne’e, Governu seluk balun mai hakarak taka tiha prosesu hotu kona-ba lori Greater Sunrise mai Timor-Leste obrigadu. Maibé atan ha’u sei halo buat hotu oinsa bele lori Greater Sunrise mai Timor-Leste,” promete PM Xanana.
Tuir Xanana, Greater Sunrise mak sei ajuda atu dezenvolve nasaun ne’e no hadia povu nia moris.
“Setor produtivu sira loos, maibé ita prodús ai-han barak tiha povu haan maibé osan iha ne’ebé, ita tenke utiliza osan mai husi Greater Sunrise, ida ne’e mak ami iha Governasaun ida ne’e nafatin esforsu lori Greater Sunrise mai Timor-Leste,” nia afirma.
Prosesu Greater Sunrise
Molok ne’e, Governu Timor-Leste finaliza ona, prosesu kona-ba sosa partisipasaun hamutuk 30% husi ConocoPhillips no 26,56% husi partisipasaun Shell Austrália nian iha kampu sira Greater Sunrise nian, loron 16 fulan-abríl tinan 2019, iha Singapura, hodi fó ba TIMOR GAP, kompañia petrolífera nasionál Timor-Leste nian, partisipasaun hamutuk 56,56%.
Reprezentante Espesiál Timor-Leste nian ba Kestaun Petrolífera sira, Kay Rala Xanana Gusmão, deklara katak, konkluzaun husi akizisaun sira-ne’e marka fin hosi prosesu ida ne’ebé hahú hafoin asinatura Tratadu nian kona-ba Ketan Tasik entre Austrália no Timor-Leste. Akizisaun ho valór 56,56% ne’ebé TIMOR GAP simu ona, sei permite atu avansa diskusaun sira entre konsórsiu Sunrise no autoridade sira husi Austrália no mós Timor-Leste nian kona-ba Kontratu foun Fahe Produsaun nian husi Greater Sunrise ne’ebé sei jere kampu mina nian sira-ne’e hafoin Tratadu ne’e hahú vigora.
Tratadu ne’e mós sei fó dalan ba kontinuidade negosiasaun sira konsórsiu Sunrise nian, agora ho TIMOR GAP, kona-ba konseitu husi dezenvolvimentu Greater Sunrise no konstrusaun planta Gás Naturál Likefeitu (GNL) iha Beasu, iha parte tasi-mane Timor-Leste nian.
Governu Timor-Leste sei serbisu nafatin atu dezenvolve Greater Sunrise lais liután, hodi benefisia parte hotu-hotu ne’ebé iha interese”.
Tranzasaun kona-ba venda ne’e kobre interese partisipativu sira hosi ConocoPhillips no Shell iha Kontratu Fahe Produsaun nian sira 03-19 no 03-20 iha Área Konjunta Dezenvolvimentu Petrolíferu ne’ebé harii ona bazeia ba Tratadu Tasi Timor nian, akordu sira jestaun nian ne’ebé iha ligasaun no kontratu sira arrendamentu nian NT/RL2 no NT/RL4 ne’ebé mak Austrália fó-sai.
Hafoin Tratadu kona-ba Ketan Tasik entre Estadu rua ne’e hahú vigora, kampu sira husi Greater Sunrise sei inklui iha Área Rejime Espesiál Greater Sunrise nian no sei sujeita ba ezersísiu konjuntu jurizdisaun nian bazeia ba Tratadu foun.
Kampu sira husi gás naturál no kondensadu Sunrise no Troubadour nian, ne’ebé hamutuk hanaran kampu sira Greater Sunrise, lokaliza besik kilómentru 150 iha sudeste Timor-Leste nian no kilómetru 450 iha noroeste Darwin, iha Territóriu Norte Austrália nian.
Timor Gap halo parte ba parseiru sira hosi Konsórsiu Greater Sunrise: Woodside (operadora) ho ida partisipasaun hamutuk 33, 44% no Osaka Gas ho 10%.
Notisia relevante:Reprezentante konsórsiu Greater Sunrise hahú halo negosiasaun ba pontu tolu
Jornalista: Hortencio Sanchez
Editór: Florencio Miranda Ximenes
