BOBONARO, 14 novembru 2024 (TATOLI) – Ministériu Saúde (MS) hamutuk Diresaun Servisu Munisipál Bobonaro, kinta ne’e halo advokasia nível munisipál ba programa kampaña planeamentu familiár iha munisípiu Bobonaro.
Kampaña ne’e realiza ho tema “Kontente ho espasu oan tinan tolu di’ak ba ha’u, família no mós nasaun.”
Xefe Departamentu Programa Imunizasaun husi Ministériu Saúde, Maria Angelina Perreira, esplika, atividade ne’e hanesan kampaña nasionál ne’ebé Ministériu Saúde lansa ona iha munisípiu Dili iha loron 25 outubru liubá, ho objetivu atu redús espasu, taxa mortalidade, fertilidade ba inan isin-rua no bebé, hamenus kazu abortu, hamenus taxa má-nutrisaun no hamenus inan sira analfabetizmu.
Atividade ne’e realiza ba família iha Dioseze Maliana, autoridade no pesoál saúde sira atu iha koñesimentu no hatutan informasaun ba inan aman sira iha baze kona-ba besifísiu husi espasu oan tinan tolu.
Xefe Departamentu ne’e subliña, Ministeriu Saúde esforsu liuhusi prestasaun kuidadu saúde primária, sekundária, terseira konsege redús taxa fertilidade ne’ebé hatudu liuhusi survey dadus demográfiku iha faze primeiru atinje 7,8%, segunda fahe 5,7% no ikus liu iha tinan 2016 iha dadus 4,2%, no bazea ba dadus sensu 2022 atinje 3,8%.
Notísia relevante: Planeamentu familiár importante hodi redús númeru mortalidade materna iha Timor-Leste
“Nune’e Ministériu Saúde halo intervensaun liuhusi kampaña nasionál ho tema “Kontente ho espasu oan tinan tolu, di’ak ba ha’u, família, komunidade nomoos ba nasaun,” nia hateten iha salaun Cruz Vermelha Timor-Leste, Filiál Maliana.
Diretór Saúde Munisípiu Bobonaro, Gíl Bernardo Viçente, reforsa, planeamentu familiár la’ós atu limita, maibé atu rekupera inan nia sistema reprodusaun saúde, presiza fó domin ba oan, fó atensaun ba labarik iha nível edukasaun saúde no fó biban ba inan ho katuas-oan bele sustenta ekonomia família.
Nia husu ba parte autoridade postu líder komunitária sira atu fó apoia másimu ba programa importante ne’e.
“Ita-nia taxa mortalidade inan ho oan durante ne’e aas tebes, sé karik buat sira-ne’e ita la rezolve taxa má-nutrisaun no kiak aas nafatin,” nia akresenta.
Sekretáriu Autoridade Munisípiu Bobonaro ba Asuntu Sosiál no Organizasaun, Júlio Carvalho Caero, prontu apoia másimu programa no polítika governu nian ne’e.
“Planeamentu familiár ne’e meiu ida di’ak tebes, ne’e la’ós atu hamate ema, maibé atu redús, tanba husu ita hotu-hotu koopera, kolabora hodi reforsa Ministériu Saúde, tanba tuir ha’u-nia haree, oan ida susu daudaun, ida sorin tanis daudaun, entaun nia laiha tempu atu kuidadu nia saúde. Ida fali katuas oan ba servisu fila mai la te’in, sira asaun kona malu,” nia fó hanoin.
Enkuantu tinan 2024, Ministeriu Saúde prioriza programa ne’e iha munisípiu haat mak hanesan; Dili, Ermera, Covalima, Bobonaro no Lautém, tanba taxa fertilidade aas no relatóriu anuál hatudu falta asesu ba programa planeamentu familiár.
Notisía relevante: MSI-TL rejista vizitante rihun 12 partisipa programa planeiamentu familiár
Jornalista : Sérgio da Cruz
Editór : Evaristo Soares Martins
