BOBONARO, 20 novembru 2024 (TATOLI) – Diresaun Servisu Agrikultura (DMSA) Munisípiu Bobonaro, liuhusi Departamentu Programa Extensaun Agríkola, distribui ona fini batar ba to’os-na’in sira hodi kuda iha rai-maran époka udan-been tinan 2024-2025.
Xefe Departamentu Exetensaun Agríkola DSMA Babonaro, Joanina Araújo, informa, fini ne’ebé fahe ho tipu noi-mutin no sale hamutuk tonelada ualu.
Nia subliña, fini hirak-ne’e distribui bazea ba pedidu husi to’os-na’in sira ne’ebé hatutan liuhusi tékniku extensionista suku.
“Ita fó hotu postu neen ho kuantidade la hanesan, pur ezemplu postu Atabae ho Balibó ne’e batar-fini sira-ne’e ita hetan husi Asosiasaun Balibo-Atabae, entaun sira-nia kuantidade fini ne’e fó de’it 500 kilograma, postu Cailaco tonelada ida, Bobonaro tonelada ida ho balu, Lolotoe tonelada ida, iha Maliana mak barak liu, tanba ita iha programa barak iha planu programa ekatre 50 ida iha Mau-Mali ne’e iha hela prosesu preparasaun fila-rai,” nia informa ba jornalista sira iha kna’ar fatin, kuarta ne’e.
Molok distribui fini, Departamentu Programa Extensaun Agrikola mós orienta tratorista sira fila ona rai ne’ebé tuir dadus provizóriu atinje ona ekatre 100-resin kompostu husi postu administrativu Maliana ekatre 43, iha Balibó ekatre 71 no daudaun ne’e sei kontinua iha suku Manapa no Meligo, postu administrativu Cailaco.
Alende ne’e apoia mós mina gratuita ba to’os-na’in sira kada ektare hetan litru 40.
“Ida-ne’e la’ós gratuitu ba ema hotu, maibé ita mós orienta ba tékniku sira atu identifika didi’ak to’os-nain sira-ne’ebé merese atu hetan apoia sira-ne’e, ezemplu sira-ne’ebé kbiit laek, dahuluk no mós ba sira-ne’ebé mak hakarak kuda tuir ita-nia orientasaun prátika agrikultura di’ak,” nia tenik.
Biban ne’e husu ba to’os-na’in sira ne’ebé hetan apoia atu kuda batar tuir tékniku prátika agrikultura di’ak nune’e bele hasa’e kuantidade produsaun rai-laran.
Enkuantu tuir dadus ne’ebé Departamentu Extensaun Agríkola rekolla iha tinan kotuk munisípiu hetan produsaun batar kuaze tonelada lima.
Jornalista: Sérgio da Cruz
Editór: Evaristo Soares Martins
