OÉ-CUSSE, 25 Novembru 2024 (TATOLI) – Vise-Ministru Komérsiu no Indústria, Augusto Junior Trindade, nota katak feira nasionál ne’ebé realiza iha monumentu Lifau, iha Rejiaun Administrativa Espesiál Oé-Cusse Ambeno (RAEOA), tanba la promove produtu bee-moos Timor-Leste iha eventu ne’e.
Governante ne’e hateten, Ministériu Komérsiu no Indústria hetan despaixu husi Primeiru-Ministru, Xanana Gusmão, hodi organiza feira ba komemorasaun Loron Proklamasaun Independénsia 28 Novembru iha Oé-Cusse, ho objetivu mak atu promove produtu lokál ne’ebé prodús rasik husi timoroan sira.
“Ita-nia planu loloos ne’e promove produtu lokál, maibé realidade ita haree rasik, produtu balun ne’ebé la’ós lokál, iha mistura, produtu balun mai husi rai-liur, liuliu hanesan bee-moos. Ohin, bá vizita ona stand sira, iha ita-nia indústria bee iha Timor-Leste, maibé tanba saida mak sei utiliza bee-husi li’ur? Maibé, komunidade iha razaun tanba bee Timor-Leste nian ladún sirkula iha Oé-Cusse, entaun bee ne’ebé iha mak Aquase, Aqua, maibé iha stand barak kuaze produtu lokál”, nia dehan.
Governante ne’e dehan feira ne’e ho objetivu atu diversifika produtu agríkola sira, hanesan sorgu halo ba sasoro, bolu no bele produs hahán seluk tan. Aleinde ne’e, promove ai-farina ba hahán oioin.
“Buat sira-ne’e mak MKI nia responsabilidade atu promove ita-nia produtu rasik no presiza orgullu ba ita-nia produtu ne’ebé iha, tanba ita timorona mak prodús”, nai hateten.
Feira nasionál ne’e, MKI prepara tenda 100-resin, ne’ebé nia partisipante mai husi RAEOA iha 48, husi munisipíu seluk 38 no husi provínsia Nusa Tenggara Timur (NTT) 40.
“Ministériu Komérsiu Indústria ko’alia kona-ba merkadu, Ministériu Agrikultura ho to’os-na’in sira ko’alia sobre produsaun. Feira ne’ebé durante ne’e halo atu fó mensajen ba agrikultór sira katak merkadu hahú nakloke, imi halo depois lori mai merkadu no ministériu ajuda atu halo promosaun”, dehan.
Notísia relevante: Primeiru-Ministru halo abertura ba feira 28 Novembru iha Oé-Cusse
Orsamentu ne’ebé MKI simu husi Ministériu Administrasaun Estatál (MAE) hodi organiza feira ne’e hamutuk rihun $57. Espozisaun ne’e hala’o durante loron neen, hahú iha sábadu 23 no sei enserra iha 28 Novembru kalan.
Jornalista: Abílio Elo Nini
Editora: Maria Auxiliadora
