Membru Tránzitu nasionál 10 apoia Komandu PNTL Oe-cusse

DILI, 27 novembru 2024 (TATOLI)-Xefe Departamentu Tránzitu Seguransa Rodoviária Nasionál, Asistente Superintendente Xefe Polísia, Luis da Costa informa katak Komandu PNTL liuhusi Departamentu Tránzitu Seguransa Rodoviária Nasionál autoriza membru na’in-10 hodi reforsa servisu Komandu PNTL Oe-cusse fó seguransa ba alta entidade durante selebrasaun loron proklamasaun independénsia 28 novembru ba dala-49 iha Oe-cusse tinan ne’e.
“Bazea ba diretiva Komandu Jerál PNTL relasiona ho loron proklamasaun independensia 28 novembru sei realiza iha RAEOA husu Departamentu Tránzitu Seguransa Rodoviária Nasionál apoia membru hodi reforsa Komandu PNTL RAEOA fó seguransa ba alta entidade sira. Totál ita haruka membru sira hamutuk ema na’in-10 hodi reforsa servisu Komandu PNTL Oecusse fó seguransa ba alta entidade,” Luis da Costa hateten ba jornalista sira iha nia kna’ar fatin Komandu Jerál PNTL Caicoli, kuarta ne’e.
Notísia relevante:RAEOA aloka rihun $200 ba komemorasaun Loron Proklamasaun Independénsia
Autoridade polisiál ne’e dehan, ema na’in-10 ne’ebé Departamentu Tránzitu Seguransa Rodoviária Nasionál apoia ba Komandu PNTL Oe-cusse ne’e sufisiente ona para bele apoia polísia Tránzitu komandu PNTL RAEOA hodi bele fo seguransa ba alta entidade.
“Ita apoia ema na’in-1o, ita mós apoia motór Tránzitu inklui karreta Tránzitu hodi sira bele utiliza fó seguransa ba ita-nia alta entidade sira ne’ebé partisipa iha serimónia ne’e,” nia konklui.
Notísia relevante:Tránzitu nasionál hato’o ona pedidu halo manutensaun ba motór batedores haat
Jornalista: Natalino Costa
Editór: Rafael Ximenes de A. Belo

