BOBONARO, 27 novembru 2024 (TATOLI)-Hafoin udan-boot iha tersa loron (26/11) tuku 18:00 ne’e akontese insidente rai-lakan tá mate labarik idade 14 ho naran Alan Gilman Yusuf iha natar laran parte Ramaskora, suku Raifun, postu administrativu Maliana, munisípiu Bobonaro.
Insidente ne’e akontese bainhira matebian ho nia kolega tolu seluk ba kail ikan iha Raboanan, Ramaskora.
“Ami ba kail ikan, ami fila mai, nia ko’alia ho ha’u-nia kolega ida-ne’e, dehan hanesan ne’e, ita-ne’e salah satu ida ba, ida harus hela, nia ko’alia hanesan ne’e, entaun ami fila, ami hein tiha Mautema, nia ko’alia tan dehan ita- nia kenangan mós barak mak ne’e, ami sa’e mai to’o kanu-ibun ne’e, ami atu ba pancing fali iha leten,nnia dehan fali ita ba pancing fali iha kraik lai, entaun ami tuir de’it nia, ami pancing iha au nia ne’e, pas nia sa’e ba leten, nia foin soe pancing hanesan rai-lakan tá nia, ami la kona, rai mak nakdoko de’it, ami halai sai husi au ne’e nia monu tiha ona, ami haruka labarik Ramaskora sira haree nia, ami halai ba bolu nia inan-aman,” Matebian nia kolega, Robinho de Jesus, informa ba Jornalista sira, iha Rai-Maten, kuarta ne’e.
Rosalino Loe-Lesu, nu’udar família sente hakfodak no sokadu hafoin rona novidade husi matebian nia mate.
“Tuir informasaun subriñu ida naran Lokotai ne’e sei ba kaer nia liman, sei verifika ninia isin , keta nia iss sei iha ka lae, tau iha nia inus, kakorok mós laiha tiha,” nia haktuir.
Rosalino haktuir durante ne’e matebian ho nia kolega sira sempre ba kail ikan no Mautema iha natar laran.
Enkuantu matebian orijen husi aldeia Rai-Maten, suku Odomau, postu administrativu Maliana, munisípiu Bobonaro, matebian eskola iha CAF Maliana, sestu-anu foin remata ezame nasionál atu hakat ba Pre-Sekundária, maibé seidauk rona rezultadu Maromak bolu ona matebian ba hamutuk iha nia kadunan Santu.
Notísia relevante: Traballadór timor-oan rai-lakan fera iha Austrália hakotu iis
Jornalista: Sérgio da Cruz
Editór: Evaristo Soares Martins
