BAUCAU, 29 novembru 2024 (TATOLI) – Ministra Edukasaun Dulce de Jesús, promete sei hadi’a di’ak liután setór edukasaun iha tinan 2025.
Ministra Edukasaun, Dulce de Jesús, hato’o apresiasaun ba Prezidente Repúblika José Manuel Ramos Horta, ne’ebé promulga ona Orsamentu Jerál Estadu (OGE, sigla portugés) ne’ebé iha tinan-oin Ministériu Edukasaun sei ezekuta orsamentu hamutuk millaun $113 ho programa lima.
“Tinan liuba ho tinan ida-ne’e mós ita halo di’ak, maibé ho alokasaun orsamentu, esperiénsia no programa ne’ebé di’ak, ha’u fiar katak ita sei kontinua lori Edukasaun ba oin,” Dulce de Jesús hateten iha Vila Nova, kinta ne’e.
Programa importante lima ne’ebé Ministériu Edukasaun sei ezekuta mak hanesan dezenvolvimentu institusionál, pre-eskolár, ensinu báziku, ensinu sekundáriu, tékniku vokasionál no ensinu rekorrente.
Governante ne’e, argumenta, kada programa referida inkluidu kedas ho alokasaun orsamentu ba área infraestrutura ne’ebé Prezidente Repúblika rasik iha ninia deskursu fó atensaun ba área infraestrutura edukativa.
“Eskola sira sei iha barak presiza tebes ita-nia apoia, tuir programa IX Governu Konstitusionál nian, ita presiza harii tán purvolta saladeaula hamutuk rihun ida-resin, ami kalkula tinan-ida ita bele halo saladeaula 200-resin, dentru tinan-lima ita bele kompleta hotu ona,” Dulce de Jesús akresenta.
Entertantu, Prezidente Repúblika José Ramos Horta, iha diskursu ba selebrasaun loron Proklamasaun Independénsia 28 novembru ba da-49 foka mós ba setór edukasaun ne’ebé hateten presiza kurríkulu akadémiku inkluzivu, ne’ebé promove iha parte valór prinsípiu direitu umanu nian.
Notísia relevante: ME husu povu prienxe ukun aan liuhusi serbisu hamutuk
Jornalista : Natalino Belo
Editór. : Evaristo Soares Martins
