DILI, 04 dezembru 2024 (TATOLI) — Ministériu Saúde liuhosi Servisu Nasionál Ambulánsia Emerjénsia Médiku (SNAEM, I.P), sosa ambulánsia lima atu distribui ba Munisípiu Aileu, Covalima, Lautem no ida koloka iha Aeroportu Internasionál Nicolau Lobato Dili no mós ida iha SNAEM,IP nasionál.
“Viatura sira ne’e kompra ho Orsamentu Jerál Estadu (OJE) 2024 ne’ebé aloka ho montante rihun $300. SNAEM nia totál osan ne’ebé hetan aprovasaun husi Parlamentu Nasionál husi hamutuk montante $2.473,928, karreta hirka ne’e hola husi nasaun Tailandia, mezmu kuantidade ambulánsia lima refere nafatin seidauk bele kobre evakuasaun emerjénsia iha Timor-Leste laran tomak”, Diretór Servisu Nasionál Ambulánsia Emerjénsia Médiku (SNAEM, I.P), Simplicio Amaral, dehan iha Palásiu Sinzas, ohin.
Nia hateten, númeru ambulánsia ne’ebé eziste iha kada servisu Emerjénsia Médiku hotu, inklui RAEOA seidauk sufisiente atu responde ba populasaun tomak nia nesesidade, iha evakuasaun emerjénsia no atendementu Primeiru Socorru, tantu iha kapital Dili no Munisípiu 12 inklui RAEOA.
“Maibé ho kuantidade ambulánsia foun lima ne’ebé mak SNAEM hetan agora, sei fó espiritu servisu di’ak liután hodi asegura, garante no servi povu ida-ne’e mesmu ho númeru ambulánsia ne’ebé uitoan, maibé neneik no bebeik, sei atinje objetivu bazeia ba planu estratéjiku SNAEM nian, ne’ebé mak mensiona katak kada Servisu Emerjénsia Médiku sira inklui RAEOA sei hetan viatura ambulánsia iha mínimu tolu hodi nune’e, bele halao servisu di’ak liután iha transferénsia no evakuasaun emerjénsia ne’ebé lais, efikas, profesionál no fó satisfasaun ba ita-nia komunidade no populasaun tomak iha Timor-Leste”, katak.
Nia relata, totál viatura ambulánsia atuál iha munisípiu 12 inklui RAEOA hamutuk 58, husi númeru ne’e di’ak hamutuk 25, aumenta tan foun 5 agora hamutuk 30, aat labele hadia hamutuk 28, husi 28 ne’ebé mak aat, SNAEM entrega ona ba Patrimóniu Estadu, ho ida-ne’e, ohin SNAEM simu viatura ambulánsia foun lima no sei distribui ba munisípiu sira ne’ebé mak agora daudaun hela ho viatura ambulánsia antigu ka tuan, munisípiu sira ne’ebé mak SNAEM identifika atu simu viatura ambulánsia foun sira ne’e mak hanesan: Munisípiu Aileu, Lautem, Covalima, no ida sei koloka iha Aeroportu Internasionál Prezidente Nicolau Lobato hodi asegura VIP sira no mós pasajeiru hotu ne’ebé ba rai liur no viajen mai Timor-Leste, no ida iha SNAEM,I.P nasionál.
“Ami mós nafatin atu atualiza inforamasaun dadus transferénsia pasiente husi munisípiu 12 Inklui RAEOA ba tinan 2023 hamutuk 13.139 pasiente no transferénsia pasiente ba tinan 2024, husi trimestre dahuluk to’o trimestre datoluk hamutuk 11.159 pasiente”, nia dehan.
Iha fatin hanesan, Vise Ministru Fortalesimentu Instituisionál Saúde, Jose dos Reis Magno, hateten katak ho ambulánsia lima ne’e bele apoiu servisu evakuasaun pasiente ba Sentru Saúde Komunitária, maske la adekuadu, maibé bele ajuda.
“Iha tinan 2025, sei aloka tan rihun $300 atu sosa ambulánsia foun lima, no ida-ne’e depende ba folin mundiál nian”, esplika Vise Ministru Jose Magno.
Vise Primeiru-Ministru, Ministru Koordenadór ba Asuntu Sosiál, Ministru Dezenvolvimentu Rurál no Habitasaun Komunitária, Mariano Assanami Sabino, afirma katak aumenta ambulánsia lima ne’e bele reforsa servisu saúde ba komunidade sira.
“Hanesan dehan ona, iha 2025 ami mós sei sosa tan ambulánsia lima, depois ami tenke sukat kapasidade hira mak presiza, atu nune’e bele ajuda ita-nia pasiente sira”, Mariano Asanami konklui.
Jornalista : Felicidade Ximenes
Editór : Zezito Silva
