BOBONARO, 05 dezembru 2024 (TATOLI) – Autoridade Munisípiu Bobonaro (AMB), liuhusi Sekretáriu Autoridade ba Asuntu Administrasaun no Finansas, Domingos da Costa, kinta ne’e ofisialmente halo inaugurasaun ba projetu husi Programa Nasionál Dezenvolvimentu Suku (PNDS) hanesan Reabilitasaun Sede Suku, Uma Naroman ba Povu (UNP) 2022 unidade sia no projetu regulár siklu IV konstrusaun irrigasaun iha Utedai, suku Raifun, postu administrativu Maliana.
Prezidente Autoridade Munisípiu Bobonaro interino, Domingos da Costa, hateten suku Raifun iha tempu 1975 liubá hanesan rai-mamuk, ema laiha, maibé agora ema nakonu nakfilak sai vila ida ne’ebé dezenvolvimentu la’o.
Atu aselera liután dezenvolvimentu, Domingos da Costa husu ba xefe suku no membru konsellu suku sira atu utiliza didi’ak sede suku hodi diskute programa no planu prioridade hodi hadi’ak liután suku Raifun iha futuru.
Notísia relevante: PNDS finaliza ona projetu RSS 15 iha postu Bobonaro
“Bainhira imi tama halo programa iha laran, hasai hotu ita-nia interese, tau hotu ba kotuk, ita tama atu ko’alia de’it planu atu halo saida, iha laran ne’e laiha fatin ita atu ko’alia kór, tanba ne’e fatin ba ema barak nia interese, Raifun-oan hotu-hotu mós tenke fó hotu hanoin, labele ko’alia iha kotuk de’it, tanba dezenvolvimentu iha suku presiza ema hotu-hotu nia kontribuisaun,” nia hateten.
Biban ne’e, Vise Prezidente Konsellu Kombatente Munisipál Bobonaro, Lúcio Dinis Marques ‘Onsar’, sente kontente no apresia tanba liuhusi programa PNDS dezenvolvimentu iha suku la’o kompara ho tinan hirak liubá.
“Ita hotu asiste ita-nia idenpendénsia ida ne’e ho boa vontade no laran-metin katak, ukun rasik-aan duni, ita hatudu ba nasaun seluk katak ita mós bele, labele dehan buat hotu ita labele, ita hotu-hotu tenke serbisu hamutuk atu lori nasaun ne’e ba oin,” tenik Onsar.
Diretór Programa Nasionál Dezenvolvimentu Suku (PNDS), Munisípiu Bobonaro, Rosario Mali, agradese ba xefe suku ho nia estrutura no komunidade no Ekipa Jestaun suku Raifun ne’ebé durante ne’e koopera no kolabora ho ekipa PDNS iha terrenu hodi fó susesu ba implementasaun obra.
Nia apela ba benifisiáriu UNP atu utiliza didi’ak uma ne’e, tanba iha suku balu benifisiáriu sira la kumpre ona matadalan ne’ebé Governu estabelese.
“Ita-boot sira molok atu sai benifisiáriu ne’e taes ba taes, iha momentu ne’ebá ita-boot sira asina tiha deklarasaun katak, kuandu simu uma ne’e, ita-boot sira sei labele fa’an uma ne’e, tanba estadu haree ba imi kbiit laek ne’e mak halo, depois labele fó aluga ba ema seluk, ne’e bandu,” nia fó hanoin.
Xefe suku Raifun, Domingos Salvador, agradese ba Governu no konsidera programa PNDS durante ne’e halo suku Raifun la’o ba oin.
“Ha’u hanesan xefe suku atu rekomenda nafatin ba Governu, programa PNDS ne’e labele hotu, tanba programa ida-ne’e benifísia direita ba iha komunidade hahú iha 2019 mai to’o ohin loron komunidade Raifun senti duni programa ne’e, maski nia orsamentu ki’ik,” nia katak.
Enkuantu orsamentu ne’ebé gasta ba reabilitasaun sede suku hamutuk rihun $17-resin, UNP unidade sia gasta rihun $153,306, konstrusaun irigasaun Utedai gasta orsamentu hamutuk rihun $38,955.
Notísia relevante: PNDS Bobonaro menus rekursu umanu kontrola projetu
Jornalista: Sérgio da Cruz
Editór: Evaristo Soares Martins
