DILI, 10 dezembru 2024 (TATOLI) – Prezidente Repúblika, José Ramos Horta, hatete katak nia parte la iha rejeisaun ho idea husi Eis-Prezidente Repúblika Francisco Guterres Lú Olo, no Eis-Primeiru Ministru Mari Alkatiri ne’ebé hatete katak líder tuan presiza hamutuk, iha unidade, nunee haree ba futuru nasaun nian.
“Ha’u konkorda, ita tenke tuur ko’alia para haree ba oin,” Prezidente Repúblika, José Ramos Horta afirma perante jornalista sira hafoin atribui Premiu Direitus Umanus Sergio Vieira de Mello Edisaun 17 ba vensedor na’in-lima, iha Palásiu Prezidensiál, Bairru-Pité, tersa ne’e.
Prezidente Repúblika dehan katak iha 2027-2028 ba oin eleisaun foun mai ne’e Timor-Leste sei tama Organizasaun Sudezte Aziátiku (ASEAN, sigla inglés) tanba la kl’eur tan tama onan tinan-2025.
“Karik depois signifika saida 2025? Tinan rua liu tiha eleisaun Prezidensiál, depois tinan ida liu tan Eleisaun Parlamentar, tenke haree! Depois ita tama ASEAN périodu trazisaun ba jerasaun, klaru sira 1975, ami-nain rua de’it ha’u no maun Xanana mak iha ha Governu,” Horta afirma.
Maibé, tuir Horta, “Di’ak liu Doutór Mari Alkatiri jerasaun 1975 no sira ne’ebé mak iha Estadu nia laran, maibé iha seluk hanesan Doutór Abilio Araújo nia la envolve iha partidu polítiku nia mós papel importante tebes iha 1974-1975 ba oin iha li’ur, no seluk tan”.
Xefe Estadu hateten katak sempre kolabora no prontu fó hanoin ba-malu hodi halo balansu ba rai ida-ne’e.
“Doutor Francisco Guterres Lú Olo la’ós hola parte hola parte iha jerasaun 1975 nia mós la’ós joven ona maibé nu’udar eis Prezidente Repúblika no Prezidente Partidu FRETILIN ema ida ha’u respeita istima, ha’u prontu sempre para ami tuur hamutuk ko’alia halo balansu ba rai ne’e nia besik 23 anos ona saida tan mak halo ba oin no oinsá para handover iha 2027 2028, ha’u laiha problema,” PR Horta tenik.
Antes ne’e, Eis-Prezidente Repúblika, Francisco Guterres Lú Olo, husu atu lideransa jerasaun datoluk sira tenke tuur hamutuk hodi halo reflesaun atu asume buat hotu-hotu hodi hatán ba povu nia moris.
“Ha’u hakarak atu hatete lider primeira jerasaun, Segunda no terseira jerasaun di’ak liu tuur hamutuk halo reflesaun hodi asume buat hotu, pozitivu no negativu ita hotu ninian, Ita asume fali buat hotu-hotu hodi lao ba oin ba ita nia beioan sira nia di’ak”, Prezidente partidu FRETILIN, Francisco Guterres Lú Olo hatete.
Eis-Prezidente Repúblika haktuir tan katak buat hotu-hotu liu ona ba kotuk, tanba ne’e importante ba líder sira tenke kaer-metin nafatin prinsípiu luta atu bele liberta povu ida-ne’e.
Nune’e mós, Sekretariu Jeral Fretilin, Mari Amude Alkatiri, hateten, durante ne’e nia halo reflesaun naruk hodi hanoin ba kauza sira luta ba ukun rasik aan ne’ebé mak saudozu sira sakrifika aan ba mate hodi haburas rezistensia luta nian.
“Agora ha’u husu ita tama iha jornada foun ho restaurasaun independensia, ita nia kauza ne’e ita define didi’ak ona ka lae, no Ita konsege komprende didi’ak kauza saida mak atu kore povu husi ki’ak ho mukit,” nia katak.
Jornalista: Osória Marques
Editór: Rafael Ximenes de A. Belo
