Governu hahú aplika taxa administrativa ba veíkulu transporta merkadoria
DILI, 16 dezembru 2024 (TATOLI)—Governu liuhusi reuniaun estraordinária Konsellu Ministu (KM), segunda ne’e, aprova projetu dekretu-lei kona-ba estabelesimentu taxa administrativa ne’ebé tenke selu ba aktu no servisu relasiona ho kontrolu ba limite pezu husi veíkulu ne’ebé transporta merkadoria.
Diploma ne’e aprezenta hosi Ministru Transporte no Komunikasaun, Miguel Marques Gonçalves Manetelu.
“Diploma ne’e regula aktu no servisu administrativu sira ne’ebé relasiona ho kontrolu ba pezu husi veíkulu sira ne’ebé transporta merkadoria ne’ebé sujeita ba pagamentu taxa hodi define ninia valór sira, atu nune’e bele kumpre rejime pezu autorizadu ba veíkulu sira ne’ebé transporta merkadoria,” referidu nota ne’ebé Agência Tatoli asesu hafoin reuniaun ezekutivu, iha Palásiu Governu.
Notísia relevante : PN aprova taxa impostu seletivu konsumu aplikável iha 2025
Valór taxa ba pezu baibain varia tuir númeru roda iha veíkulu mak $30 ba veíkulu ho roda haat , $35 ba veíkulu ho roda neen, $40 ba veíkulu ho roda ualu no 45 ba veíkulu ho roda 10 ka liu.
Kona-ba verifikasaun ba ninia todan, ne’ebé hala’o hafoin hasai todan ne’ebé liu iha kustu fiksu ho $5 kada kilograma ne’ebé liu.
Diploma ne’e mós estabelese limite másimu pezu ne’ebé hetan autorizasaun ba kategoria veíkulu ida-idak, kilógrama 5.000 ba veíkulu ho eixu rua no roda haat, kilógrama 8.500 ba veíkulu ho eixu rua no roda neen, kilógrama 15.500 ba veíkulu ho eixu tolu no roda neen, no kilógrama 18.000 ba veíkulu ho eixu tolu no roda 10.
Veíkulu sira ne’ebé servisu ba Estadu, forsa defeza no seguransa, misaun diplomátika no entidade públika sira seluk hetan izensaun husi regulamentu ida-ne’e.
Aleinde ne’e, sei bandu sirkulasaun veíkulu sira nian to’o regulariza taxa pendente sira no pezu boot liu, ho sansaun sira ne’ebé prevee iha lejizlasaun ne’ebé bele aplika bainhira laiha kumprimentu.
Dekretu-lei ida-ne’e ho objetivu atu kontribui ba prezervasaun infraestrutura estrada no ponte, hadi’a seguransa iha tráfiku automóvel no garante kumprimentu ba padraun legál husi operadór transporte merkadoria nian.
Jornalista : Arminda Fonseca
Editora : Julia Chatarina
