DILI, 24 dezembru 2024 (TATOLI) – Hamoos demarkasaun símbolu Grupu Arte Marsiál (GAM) ho Grupu Arte Rituál (GAR) iha dalan públiku importante tanba sidade presiza moos.
Atividade limpeza ne’e realiza husi Ministériu Interiór hamutuk ho Komandu Polísia Nasionál Timor-Leste (PNTL) ho lideransa komunitária no husi Komisaun Reguladora Arte Marsiál (KRAM).
Ministru Interiór Francisco Guterres, dehan atividade ida-ne’e, kompromisu Governu nian, sériu hodi tau atensaun ba hahalok grupu arte marsiál no arte rituál ne’ebé mak sempre pinta dalan públiku sira.
¨Ohin ne’e ita halo lansamentu ida hamutuk ho KRAM iha ne’e. polísia no autoridade lokál atu hamoos tiha símbolu arte marsiál no arte rituál sira ne’ebé hakerek iha dalan públiku. Ho intensaun atu labele hamosu rivalidade ida ne’ebé mak nakloke para depois to’o ikus kria fali problema iha komunidade nia leet¨, Ministru hateten ba jornalista sira hafoin partisipa iha serimónia lansamentu limpeza iha Eskuadra PNTL Dom Aleixo, tersa ne’e.
Francisco husu ba komunidade sira atu kontrola hodi labele iha individu ida ka grupu ida atu pinta fila fali parede sira ho símbolu arte marsiál no arte rituál nian.
¨Ha’u husu ba ita boot sira hotu atu kontrola fatin sira ne’e, ajuda hela polísia no KRAM no institusaun sira seluk atu ita hadia ita-nia sidade Dili no hanorin ita-nia arte marsiál sira ne’e para sira bele partisipa ativamente iha dezenvolvimentu nasionál¨, nia adianta.
Governante ne’e dehan, grupu arte marsiál no rituál balun mak pinta hikas símbolu arte marsiál nian mak komunidade hetan, ida-ne’e krime no sei prosesa ba Ministériu Públiku.
¨Se de’it mak komesa atu kria fali tensaun iha komunidade nia leet ne’e lei iha atu lori ba Tribunál tanba ne’e dezobidénsia, kuandu dezobidénsia ne’e krime. Tanba ne’e mak ita husu katak komunidade sira mós tenke ho laran kmanek atu bele tau matan¨, nia afirma.
Iha fatin hanesan, reprezentante Komandante Jerál PNTL, Superintendente Xefe Polísia, Jose Soares, hateten inisiativa ida-ne’e di’ak husi Komandu PNTL Munisípiu Dili hamutuk ho autoridade munisípiu Dili ho autoridade lokál no Komisaun Reguladora Arte Marsiál halo limpeza iha Dili liuliu atu hamoos parede sira ne’ebé marka ho símbolu arte marsiál no rituál.
¨Ohin ita halo limpreza ida-ne’e iha Dili, husu ba hothotu atu koopera, kuandu iha individu ida mak tenta viola ida-ne’e mak nia kontinua marka ka riska parede hodi pinta símbolu arte marsiál sira nian ne’e sala¨, nia dehan.
Nia husu ba joven sira atu muda hanoin, husi hanoin ladún di’ak tenke ba dalan ne’ebé di’ak hodi kontribui ba estabilidade nasionál.
Prezidente KRAM, Octavio da Conceição, dehan KRAM hamutuk ho Ministériu Interiór, Komandu PNTL no Autoridade Lokál halo limpeza hodi hamoos símbolu arte marsiál no arte rituál sira ne’ebé mak individu balun marka iha parede no dalan protokolu iha Dili laran.
Nia dehan, atividade ida-ne’e, Komisaun Reguladora Arte Marsiál liuhusi orientasaun Ministru Juventude Desportu Arte no Kultura servisu hamutuk ho autoridade munisípiu Komandu PNTL Munisípiu Dili no autoridade lokál halo limpeza hodi hamoos símbolu arte marsiál no arte rituál sira ne’ebé mak joven no pratikante arte marsiál no arte rituál ne’ebé marka iha parede no uma iha dalan protokolu iha Dili laran.
Jornalista: Natalino Costa
Editór : Zezito Silva
