Autoridade RAEOA kuda salak hún rihun rua iha sub-rejiaun Pássabe
OÉ-CUSSE, 26 dezembru 2024 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério Tiago de Fatima Lobato, ho inisiativa kuda salak hún rihun rua (2000) iha suku Abani no Malelat, sub-rejiaun Pássabe.
“Insiativa kuda ai-fuan salak ne’e, kapas tebes ko’alia kona-ba agrikultura iha ita-nia rain, ita-nia hanoin kuda batar ho hare, maibé agrikultura ne’e ita bele halo mós kuda ai-fuan barak no hanoin mós ortikultura ita tenke kuda modo nune’e bele fa’an iha merkadu,” Rogério Lobato ko’alia iha Pássabe.
Notísia relevante: Rogério Lobato vizita populasaun iha suku Usitaqueno no rona sira-nia preokupasaun
Ba oin, Autoridade sei apoia formasaun téknika ba grupu agrikultór sira, hodi kontinua enkoraja agrikultór sira atu kuda barak tan.
“Ha’u sei koordena ho asesór asuntu agrikultura no Sekretária Rejionál ba Agrikultura atu kria kooperasaun ho kompañia Mini Green hodi fasilita formasaun tékniku kona-ba kuda salak, mankis, rambutan, abokate, ai-ata, hudi, ai-nanas, maski daudaun merkadu seidauk iha maibé tanba kestaun estrada aat,” nia realsa.
Xefe suku Abani, Carlos Elo, agradese tanba maske kondisaun estrada ho tempu udan, maibé konsege to’o duni sub-rejiaun Pássabe atu halo lansamentu kuda ai-oan salak iha komunidade nia leet.
“Ami agradese liuliu agrikultura tanba planu di’ak atubele halo kuda ai-oan iha fatin ne’e, ba oin ami husu ba fatin mamuk iha sub-rejiaun Pássabe mós sei luan, liuliu rai ne’ebé abandonadu bele kuda tan nune’e bele halo rai ne’e sai matak liutan, tanba Pássabe rai malirin, tán ne’e ami agradese tanba salak ne’e, foin dahuluk kuda iha Pássabe, ami promete sei kuida no haree didi’ak ai-oan sira-ne’e atu iha rezultadu,” nia orgullu.
Notísia relevante: Rogério Lobato promete rezolve problema infraestrutura bázika iha sub-rejiaun sira
Diretór Rejionál Agrikultura Oé-Cusse, Amaro Efi, informa, salak hún 2000 ne’e Autoridade RAEOA koopera ho kompañia Mini Green husi Filipina mak apoiu hodi kuda iha Postu Administrativu Passabe.
“Kuda ai-salak 2000 ne’e ba ektare rua iha suku Abani, faze tuir mai tékniku sira sei identifika tan fatin balu iha suku Malelat, tanba sub-rejiaun Pássabe área potensialidade tan ne’e ba oin parte agrikultura sei identifika tan dezenvolve tán tanba fatin ne’e rai malirin,” nia hateten.
Jornalista: Abílio Elo Nini
Editór: Evaristo Soares Martins
