DILI, 06 janeiru 2025 (TATOLI)–Sekretariu Estadu Asuntu Toponímia no Organizasaun Urbana (SEATOU), Germano Santa Brites Dias, husu ba populasaun sira iha aldeia Fomento II, suku Comoro, ne’ebé hetan despezu administrativu iha Díli ka muda ona ba munisipiu atu hatama pedidu inkluzaun oan ba eskola.
Notísia Relevante: PN apoia SEATOU muda sai komunidade hela iha área risku dezastre
Apelu ida-ne’e mós, nia dehan, atu garante nafatin oan sira ka estudante sira atu labele abandona sira-nia estudu, bainhira husik hela kapital ba hela iha populasaun sira-nia moris fatin iha munisipiu sira.
“Ba inan-aman sira, sira-nia oan sira eskola iha ne’e mak hetan dezastre hanesan ne’e halo favór hatama dadus ba SEATOU no Munisipiu Dili atu aprezenta ba Konsellu Ministru, atu deside no fó ba Ministériu Edukasaun atu atende sira-nia oan iha munisipiu sira,” nia husu ba inan-aman sira iha Fomento II.
Nia hateten, forsa natureza mai sobu ema-nia uma la haree ba ema sé de’it, estudante ka universitariu sira, tanba ne’e mak husu esforsu hotu-hotu nian.
“Hanesan universitariu sira, ita buka esforsu aan atu buka fatin hodi kontinua sira-nia estudu. Natureza la hare ba SD, SMP no universitáriu,” nia hateten.
Tuir governante ne’e, natureza ne’e mai afeta ba em hotu nia moris, bainhira hela risku.
Tuir dadus SEATOU nian, populasaun hamutuk uma kain 288 mak hetan despezu administrativu iha Fomento II-Comoro.
Jornalista : Jesuína Xavier
Editór : Cancio Ximenes