IOM kontinua apoia Timor-Leste iha área migrasaun no jestaun fronteira
DILI, 07 janeiru 2025 (TATOLI) – Prezidente Repúblika, José Ramos-Horta, tersa ne’e, hasoru malu ho Xefe Misaun Organizasaun Internasionál Migrasaun (IOM), Jewel Trishia Ali, hodi ko’alia kona-ba asuntu apoia setór migrasaun no jestaun fronteira.
“Ha’u ko’alia ho Prezidente Repúblika kona-ba prioridade balun kona-ba asuntu migrasaun nian ba oin atu haree ba asuntu jestaun orden no seguransa iha fronteira,” dehan Xefe Misaun IOM, Jewel Trishia Ali, iha Palásiu Prezidensiál Dili, ohin.
Iha sorumutu ne’e, Xefe Misaun ne’e diskute ho Xefe Estadu kona-ba kestaun sira dezlokasaun ne’ebé akontese tanba perigu naturál sira hanesan inundasaun no forma hirak-ne’e aspetu importante barak husi IOM nia servisu iha Timor-Leste.
Aleinde ne’e, Xefe Estadu ho Xefe Misaun IOM mós ko’alia kona-ba jestaun fronteira hodi jere fronteira sira ba seguransa ho seguru ba povu Timor-Leste nian.
“Oinsá mak ita bele asegura sasán sira hanesan protesaun kona-ba tráfiku umanu no oinsá mak ita bele prevene buat sira hanesan migrante, kontra bandu ne’e mak asuntu seguransa nasionál. Ha’u mós ativu teb-tebes iha Estadu Timor-Leste durante tinan 25 nia laran,” nia afirma.
Ho situasaun sira ne’e, Prezidente Repúblika orgullu ho servisu IOM nian tanba nu’udar parte husi sistema ONU nian no Xefe Estadu hakarak IOM atu kontinua servisu hamutuk ho Governu Timor-Leste.
“Prezidente Repúblika orgullu ho ami nia servisu, nune’e ami mós ko’alia kona-ba aspetu xave balun ne’ebé ha’u hakarak halo liutan mak hanesan asegura katak kapasidade boot iha funsionáriu sira ne’ebé iha misaun IOM hetan esperiénsia no espozisaun internasionál,”nia kompromete.
IOM prontu nafatin atu servisu ho Estadu Timor-Leste liuliu iha área migrasaun hodi fó protesaun ba timoroan sira iha ne’ebé de’it bainhira hasoru difikuldade.
Notisia relevante:IOM apoia Governu liuhosi área jestaun fronteira-tráfiku umanu-mobilidade laborál
Jornalista: Hortencio Sanchez
Editór: Florencio Miranda Ximenes
