IOM apoia Governu liuhosi área jestaun fronteira-tráfiku umanu-mobilidade laborál
DILI, 25 jullu 2023 (TATOLI)—Xefe Misaun Organizasaun Internasionál Migrasaun (IOM), sigla inglés) iha Timor-Leste, Aishath Ihma Shareef, hateten IOM kontinua apoiu Governu Timor-Leste liuhosi área prinsipál ha’at.
“Ohin, hasoru malu ho Prezidente Repúblika hodi ko’alia kona-ba serbisu ne’ebé IOM hala’o hodi apoiu Governu entermu aspeitu sira jestaun fronteira, tráfiku umanu, área apoiu dezástre natural nian no mobilidade laborál,” Ihma Shareef hateten ba jornalista sira hafoin ramata enkontru ho Prezidente Repúblika (PR), José Ramos Horta, iha Palásiu Prezidensiál Nicolau Lobato, Bairru Pite, tersa ne’e.
Nia hatutan, IOM hala’o serbisu iha aspeitu rua importante mak enkuadramentu legál fó apoiu elabora SOP no apoiu revizasaun ba lei balun ne’ebé fó impaktu ba risku dezastre naturál.
Relasiona ho tráfiku umanu ninian la ko’alia númeru tráfiku umanu nian, maibé IOM dahuluk serbisu iha área prevensaun, protesaun no halo mekanizmu referál ho ajénsia sira iha Governu nian no komunidade, no halo mós analiza risku ba iha komunidade ne’ebé hela iha área fronteira nian.
Ida-ne’e ho kooperasaun UNICEF hodi haree vulnerabilidade komunidade nian, oinsá atu prevene halo intervensaun no protesaun no inplementa mekanizmu referál bainhira hasoru problema ne’ebé komunidade hasoru.
Kona-ba apoiu mobilidade liuliu ba timoroan sira-ne’ebé iha Portugál no IOM kontinua halo serbisu ho Ministéiru Negósiu Estranjeiru no Kooperasaun (MNEK) dezenvolve sira-nia polítika no enkuadramentu legál ruma hodi fó protesaun ba traballadór sira no fó ona apoiu balun hodi ajuda sira fila mai Timor-Leste.
Atu asegura, nia hateten, IOM nia papél iha ne’e atu sira bainhira halo mobilidade laborál sai ba rai-li’ur tenke tuir dalan ne’ebé formál no halo advokásia ba Governu, atu regula ita nia ajénsia empregadora iha Timor-Leste inklui ajénsia viajen, nune’e sira sai ho seguru no hetan protesaun.
“Papel importante IOM nian mak fó apoiu mobilidade laborál, nune’e nia bele sai seguru,” nia dehan/
Iha enkontru ne’e, Prezidente Repúblika hatán ho resposta ne’ebé di’ ak tebes entermu diskusaun ne’ebé iha no PR husu hanesan ita hatene PR mak hanesan xefia Konsellu Superiór Defeza nian, entaun kestaun sira-ne’ebé IOM relata bele sai asuntu ba PR hodi toka no ko’alia mós iha reuniaun konsellu ministru nian.
Jornalista : Nelson de Sousa
Editór : Cancio Ximenes
