DILI, 07 janeiru 2025 (TATOLI)–Xefe Departamentu Servisu Água no Saneamentu iha Autoridade Munisipal Dili (PAM), Domingos Soriano dos Santos, hateten PAM estende hela kontratu empreza Labilay, Nelsis no GSA hodi rekolla lixu ho manuál iha kapitál Dili, hahú husi janeiru to’o fevereiru hodi hein prosesu konkursu públiku.
Notísia Relevante: Ekipa SEATOU no AMD taka stiker ba kamioneta 100 raut foer
Daudaun ne’e, nia dehan, Governu hapara kontratu ba empreza sira-ne’ebé raut lixu manuál de’it maibé ba empreza China Harbour no Pax kontinua la’o ho karreta modernu ka kompaktór hodi rekolla lixu sira iha kapitál Dili.
“Sira kontinua hela, extende ba fulan rua hodi halo konkursu públiku foun. Sira-nia kontratu ramata iha 31 dezembru 2024,” Xefe Departamentu Servisu Água no Saneamentu iha Autoridade Munisipal Dili (PAM), Domingos Soriano dos Santos, hateten ba Agência TATOLI liuhusi telefónika, segunda (06 janeiru 2024) ne’e.
Nia relata, empreza sira-ne’ebé daudaun ne’e PAM extende sira-nia kontratu hodi raut lixu manualmente iha kaiptál Dili mak hanesan empreza Labilay, Nelsis no GSA (Gali Soares Araújo).
Antes ne’e, Prezidente Autoridade Munisipal Dili, Gregório Saldanha, hateten hakarak hapara kontratu empreza sira-ne’e tanba raut lixu la tuir oráriu.
Nune’e mós, antes ne’e, Autoridade Munisípiu Dili (AMP) kontrata empreza lima (5) hodi raut lixu iha kapitál Dili mak hanesan empreza Labilay, Gali Soares Araújo (GSA), Pelpra, Necles no Felifra Viham.
Notísia Relevante: Sidadaun iha Sidade Dili prodús lixu tonelada 250 kada loron
Jornalista : Jesuína Xavier
Editór : Cancio Ximenes
