iklan

HEADLINE, SEGURANSA

Polísia submete kazu tiru rezidénsia antigu Prezidente Lu-Olo ba Ministériu Públiku

Polísia submete kazu tiru rezidénsia antigu Prezidente Lu-Olo ba Ministériu Públiku

Xefe Departementu Investigasaun Kriminal Nasional (DIKN) Superintendente Polisia Joao Belo dos Reis. Imajen Tatoli/Egas Cristovão

DILI, 07 jeneiru 2025 (TATOLI) – Xefe Departamentu Investigasaun Kriminál Nasionál (DIKN) Superintendente Xefe Polísia, João Belo dos Reis, dhean PNTL liuhusi DIKN submete ona ba Ministériu Públiku kona-ba kazu ema deskoñesidu lori arma tiru tama rezidénsia antigu Prezidente Repúblika Francisco Guterres Lu-Olo, iha Farol foin lalais.

Reis rekorda katak akontesimentu ida-ne’e iha 1 janeiru 2025, iha madrugada. Mosu mak ema deskoñesidu tiru no bala musan ba antigu Prezidente Repúblika Lu-Olo nia rezidénsia iha Farol. Hafoin ida-ne’e, liuhusi Departamentu Investigasaun Kriminál hamutuk ekipa tékniku Forensik PNTL ba kedan lokál akontesimentu hodi haree no halo rekontrusaun. Bainhira halo rekonstrusaun ba fatin, identifika katak bala musan iha duni fatin no bala musan ne’e tiru sae ba leten no husi tiru sae rezulta kalen kuak.

¨Bala musan ne’ebé mak monu iha rai ne’e nove mil metru. Ita seidauk hatene ida-ne’e mai husi kilat tipu ida ne’ebé, mas ita hatene ona katak ne’e nove mil metro, entaun ne’e husi kilat kiik. Tanba nia monu ne’e nove mil metru. Maibé atu dehan ida-ne’e katak pistola tipu ida ne’ebé ita seidauk hatene. Ba kazu ida-ne’e Departamentu Investigasaun Kriminál, ami aprezenta ona ba Ministériu Públiku, ho NUC 003/2024 PNSIK ¨, Komandante João Belo ba jornalista sira iha nia knaar fatin Komandu Jerál Caicoli, tersa ne’e.

Nia dehan, atu identifika bala musan ne’e pertense ba pistol  ho tipu saida mak Departamentu Investigasaun Kriminál husu apoiu ba  parseiru sira atu halo ezame  balástiku atu hatene lolos tipu pistola ne’ebé momentu ema deskoñesidu uza tiru ba antigu Prezidente Repúblika Lu-Olo nia rezidénsia. Tanba Timor-Leste seidauk iha aparellu sufisiente atu halo ezame ba bala musan.

¨Entaun ita husu ita-nia parseiru sira atu halo ezame balástiku ba projetil ka bala musan ne’ebé mak ita hetan. Ba ita-nia parseiru sira, se mak atu apoiu, halo ezame ba ida-ne’e, ha’u labele koalia iha ne’e tanba segredu justisa¨, nia adianta.

Belo subliña, ba kazu ne’e polísia seidauk kaer suspeitu ruma tanba momentu akontesimentu ne’e halo husi ema deskoñesidu ho nune’e mak polísia  kontinua bua tuir suspeitu ba kazu ne’e. Polísia deskobre ona bala ne’e nia medida, maibé musan ne’e atu mai husi ema sivil ka husi polísia ka mai husi militar seidauk hateten ne’e tanba prosesu investigasaun sei lao hela.

¨Ita seidauk bele hateten kazu ne’e tama ba krime organizadu ka hateten ami ida militár no polísia ne’ebé kaer arma sira ne’e mak dala ruma tiru sala, ita seidauk hatene ida-ne’e, maibé ne’e akontese ona prosesu investigasaun sei justifika, ita servisu makas hela atu hatudu verdade husi kazu ne’e¨, nia afirma.

Nia husu ba komunidade sira ne’ebé hela besik iha rezidénsia antigu Prezidente Repúblika Lu Olo nia atu koopera ho polísia atu buka tuir suspeitu ba kazu ne’e.

Notísia relevante : PNTL kontinua buka tuir suspeitu ne’ebé tiru bala musan ba rezidénsia antigu Prezidente Lú Olo

Jornalista: Natalino Costa 

Editór : Zezito Silva

iklan
iklan

Leave a Reply

iklan
error: Content is protected !!