DILI, 11 janeiru 2025 (TATOLI)–Xefe suku Comoro, Eligio José da Silva Marçal, husu ba komunidade iha suku Comoro, postu administrative Dom Aleixo, munisípiu Dili, atu soe lixu iha lixeira no tuir oráriu no oras ne’ebé determinadu.
Notísia Relevante: PAM estende kontratu empreza Labilay-Nelsis-GSA raut lixu iha kapitál Dili
“Ha’u-nia mensajen ba komunidade kona-ba lixu namkari iha kapital liuliu iha suku Comoro, Governu tau ona kaixote lixu (masa) ka lixeiru fatin-fatin, nune’e husu ba komunidade katak tuir orariu soe lixu mak kalan tuku 07 kalan to’o tuku 06 dadeersan,” xefe suku ne’ hateten ba Agência TATOLI iha Fomentu I Comoro, sesta (10 janeiru 2025) ne’e.
Autoridade lokál fó sai avizu katak se liu ona oráriu ka oras sira-ne’e ba leten, husu komunidade iha lixu ruma karik haloot iha saku ka karrosa ruma atu bele soe iha kalan ka dadeer tuir oráriu ne’ebé Governu fó sai ona.
Tuir nia, ida-ne’e atu garante ambiente mós iha espasu públiku sira liuliu besik fatin soe lixu, nune’e husu ba komunidade atu soe lixu iha kaixote lixu nia laran tanba sei iha ema balun ne’ebé seidauk iha konxiénsia hodi soe lixu iha nia fatin maibé sei soe iha kaixote lixu nia li’ur ka nia sorin-sorin.
“Lixeira ne’e sei mamuk, tenke soe lixu iha laran ne’ebá. Labele haruka labarik sira ba soe lixu, tanba todan sira labele hiit sae fakar ba kaixote lixu nia laran maibé fakar naklekar iha rai,” nia dehan.
Xefe suku ne’e hateten, iha tempu udan ne’e lixu bele fó impaktu ba ema-nia saúde no lixu bele halo baleta intupidu hodi hamosu inundasaun, tanba ne’e husu komunidade atu koopera hamutuk hodi haree ba saúde públiku no evita dezastre naturál.
Jornalista : Jesuína Xavier
Editór : Cancio Ximenes
