DILI, 14 janeiru 2025 (TATOLI)—Komisáriu Komisaun Antí Korrupasaun (CAC, sigla portugés), Rui Pereira dos Santos, hateten CAC simu delegasaun hosi Ministériu Públiku (MP) atu investiga kazu aviaun Zona Espesiál Ekonomia Merkadu Sosiál (ZEESM) inklui rai no rezidénsia Fulolo iha Rejiaun Administrativa Espesiál Oé-Cusse Ambeno (RAEOA).
Aleinde ne’e, Rui informa, Komisaun Antí Korrupasaun mós hetan delegasaun kompeténsia husi Ministériu Públiku atu halo investigasaun kle’an ba kazu aviaun ZEESM no kazu rezidénsia Fulolo.
Nia hatutan, ba kazu aviaun ZEESM ne’e, CAC hahú ona inisia prosesu investigasaun. Enkuantu, kazu rai no rezidénsia Fulolo ne’e CAC kontinua halibur dokumentu sira tanba antes ne’e ekipa CAC iha ona terenu halo investigasaun.
“Kazu aviaun ZEESM nian ne’e investigasaun la’o hela. Agora iha hela faze rekolla dokumentu no dokumentu sira-ne’e ita presiza rekolla nune’e ita hatene krime ne’e akontese ka lae. Tanba ne’e mak presiza hakle’an investigasaun ida-ne’e no prosesu ida-ne’e la’o hela. Nune’e mós, kazu rai no rezidénsia Fulolo CAC halo hela investigasaun nune’e hatene rai ne’e merese atu fa’an ka lae. Ida-ne’e mós ita presiza nia legalidade rai no uma ne’e Estadu nian ka ema partikulár nian,” Rui hateten ba jornalista sira iha nia kna’ar fatin, Farol, Dili, tersa ne’e.
Notisia relevante: Rogério Lobato preokupa despeza no reseita husi operasaun aviaun ZEESM
Nia esplika, kuandu CAC investiga mak uma no rai ne’e Estadu nian entaun kontratu kompra no venda ne’e nulu ka la vale ona.
“Maibé ida-ne’e husik mai CAC investiga depois mak nia rezultadu ikus ne’e iha ka lae krime sira-ne’e,” nia afirma.
Tuir Komisáriu ne’e katak kona-ba rai no rezidénsia Fulolo molok ne’e mosu versaun oin-oin. Balun dehan aluga de’it, balun dehan fa’an ba malu, ne’ebé husi parte CAC sei rekolla dokumentu.
Notisia relevante: Prezidente RAEOA Rogério Lobato prontu hatán Mari Alkatiri iha tribunál
“Hanesan ezemplu, Komisáriu CAC derepente uma ida-ne’ebé agora sai fatin ba Komisáriu halo serbisu loron-loron mak Komisáriu fa’an ne’e oinsá? Entaun, lei iha atu haree ida-ne’e. Kuandu uma no rai ne’e Estadu nian, entaun kontratu kompra no venda ne’e la vale ka nulu. Maibé, ita sei haree investigasaun nia rezultadu ne’e mak sei hatudu lia-loos,” Rui konklui.
Entretantu, antes ne’e, Autoridade Rejiaun Administrativa Espesiál Oé-Cusse (RAEOA) deside hapara movimentasaun aviaun ZEESM hodi submete ba prosesu investigasaun tanba identifika mosu irregularidade balun.
Prezidente Autoridade RAEOA, Rogério Tiago Lobato, akompaña husi Ministru Transporte no Komunikasaun, Miguel Marques Gonçalves Manetelu, Diretór Ezekutivu Aero Dili, Lourenço de Oliveira ho Autoridade Nasionál Administrasaun Aviasaun Timor-Leste (ANAATL), liuhusi konferénsia imprensa, informa katak atu solusiona konetividade aéreu nian durante aviaun ZEESM tama iha prosesu investigasaun, Aero Dili mak sei halo operasaun, ho rute Dili-Oé-Cusse no Oé-cusse-Dili.
Nune’e mós, iha loron 22 maiu liubá, Prezidente Autoridade RAEOA, Rogerio Tiago Lobato, hamutuk ho membru Autoridade no akompaña mós husi PNTL no serbisu terra no propriedade, vizita ofisiál ba iha rezidénsia Fulolo, lokaliza iha aldeia Sanane, suku Costa, sub-rejiaun Pante Makasar.
Iha ámbitu vizita ofisiál ne’e, Rogério Tiago Lobato, promete sei anula tiha dokumentu akordu kona-bá kontratu kompra venda fa’an uma Estadu iha rezidénsia Fulolo, ne’ebé selebra husi AntiguPrezidente Autoridade Mari Alkatiri no Arsénio Paixão Bano, tanba konsidera akordu ne’e abuzu podér.
Tuir Rogério Lobato, karta akordu kontratu promesa kompra e venda ne’e, autoridade sesante halo ona iha loron 23 outubru 2017, abaixu assinadu husi Arsénio Paixão Bano nu’udar Prezidente Autoridade ein-exersísiu nu’udar mós parte fa’an, ho kompradór mak Mari Bim Amude Alkatiri.
Jornalista: Natalino Costa
Editór: Xisto Freitas da Piedade