DILI, 14 janeiru 2025 (TATOLI) – Komisáriu Komisaun Anti-Korrupasaun (CAC, sigla portuges) Rui Pereira dos Santos, haktuir Ministériu Públiku fó ona orientasaun ba Komisaun Anti-Korrupsaun (CAC, sigla portugés) no Polísia Sientífika Investigasaun Kriminál (PCIC) atu apoia malu hodi fó solusaun liuhusi investigasaun ne’ebé klean ba kazu Ró Haksolok.
¨Kazu kona-ba Ró Haksolok ninian, ami ho Ministériu Públiku enkontru ona no ami informa kona-ba kazu ida-ne’e. Liuhusi enkontru ne’e, Ministériu Públiku konkorda katak oinsa fó solusiona ba kazu ida-ne’e. Tanba ne’e, Ministériu Públiku reune ho CAC no PCIC husu ami atu servisu hamutuk oinsa atu konklui investigasaun ba kazu Ró Haksolok ninian¨, Rui Pereira hateten ba jornalista sira iha nia knar fatin Faról, tersa, ohin.
Tuir nia, kazu Ró Haksolok ne’e koñesidu perante públiku, tantu kestiona husi partidu polítiku sira tanba ho razaun ida katak Berlin Ramelau mai tiha ona, maibé Ró Haksolok seidauk mosu hela de’it.
¨Ami iha informasaun ba ró ne’e tanba ami nia staff balun foin daudaun ba Portugal konsege ba vizita ró ne’e, ró ne’e nia kondisaun hahú taka fila fali nia laran sira ne’e no hahú hadia fali¨, nia adianta.
Komisária CAC ne’e dehan, prosesu ba Ró Haksolok ne’e, CAC rekolla hela dokumentu, atu labele koalia mamuk bainhira fó informasaun.
¨Ita koalia tenke ho prova, dokumentu ne’e ami iha ona. Maibé ita presiza kompleta prova. Prova ne’e bele prova dokumentál, sasin sira no tempu ida ita sei to’o arguidu sira maibé atu sasin hira mak agora CAC bolu ona, ami labele fo hateten. Kuandu dokumentu sira ne’e ke’e hotu ona, sasin sira ne’e no inklui arguidu sira iha ona. Prova sufisiénte ona ita submete ba Ministériu Públiku no halo julgamentu iha Tribunal¨, nia afirma.
Komisária CAC dehan, Governu mós pronúnsia ona katak sei halo mós auditoriu ba Ró Haksolok, kuandu rezultadu auditóriu ne’e iha ona, entaun CAC bele uza rezultadu auditoria hodi reforsa investigasaun CAC nian.
¨Ita labele husik kestaun sira hanesan ne’e. Tanba Ró Haksolok, Governu gasta ona osan millaun $30-resin, ita tenke buka tuir sasan sira ne’e, sasan sira ne’e labele mout leet de’it. Hanesan instituisaun ne’ebé mak tau matan atu prevene ba kombate korrupasaun prova kuandu sufisiente no ivestigasaun ita konklui, ita submete ba Ministériu Públiku¨, nia haktuir.
Nia dehan, kazu korrupasaun ne’e komplexu, lahanesan kazu krime sira seluk hanesan violénsia doméstika, ba kazu ne’e, arguidu bele deklara aan katak nia mak komete maibé ba kazu korrupasaun ne’e tenke buka evidénsia no testamuña sira ne’e mak susar.
¨Prova sira ne’e mak komprova katak nia ne’e mak autór tanba ne’e mak tenke buka evidénsia halo didiak kuandu evidénsia no sasin oke ne’e laiha problema¨, nia konklui.
MP delega kompeténsia ba CAC hakle’an investigasaun ba Ró Haksolok
CAC bolu antigu governante Inacio Morreira ba konstrusaun Ró Haksolok
CAC rona ona sasin 20 ba kazu ró Haksolok
Jornalista: Natalino Costa
Editór : Zezito Silva
