DILI, 15 janeiru 2025 (TATOLI)—Diretór Jerál Prevensaun no Sensibilizasaun husi Komisaun Antí Korrupasaun (CAC-sigla portugés), Antoninho da Cruz, hateten durante tinan 2024 CAC rejista kargu xefia hamutuk ema na’in 439 tarde aprezenta (deklara) sira-nia rikusoin ba CAC.
“Ita rejista ona instituisaun Estadu hamutuk 120. Husi instituisaun 120 ne’e ita aplika sansaun (selu koima) ba kargu xefia ka funsionáriu hamutuk 439 tanba durante tinan 2024 sira tarde halo deklarasaun rikusoin ba Komisaun Antí Korrupasaun. Funsionáriu sira ne’ebé tarde halo aprezentasaun rikusoin ne’e mai husi instituisaun 40,” Antoninho hateten ba jornalista sira iha nia kna’ar fatin, Matadouro, Dili, kuarta ne’e.
Nia dehan, kargu xefia sira husi instituisaun Estadu 40 ne’ebé seidauk aprezenta rikusoin mak Autoridade Munisípiu Ermera iha funsionáriu 44, Autoridade Munisípiu Liquiçá 38, SEFOPE 15, Autoridade Munisipál Covalima 18, Sekretaria Estadu Kooperativa (SEKOOP) 24, tuir mak Banku Nasionál Komérsiu Timor-Leste ( BNCTL-sigla portugés), Ministériu asuntu Kombatente Libertasaun Nasionál inklui instituisaun 33 seluk.
Notísia relevante: Deklarasaun Rikusoin Meius Ida Kombate Korupsaun
“Totál osan ba aplikasaun koima sira ne’ebé ita kolleta iha 2024 ne’ebé tama ba kofre CAC nian ho montante $75.612. 42,” nia esplika.
Antoninho informa, relasiona ho Deklarasaun Bens Rendimentu no Interese (DBRI), CAC haruka karta formál ba nível ministeriál no mós Autoridade Munisipál sira hotu katak hahú 01-31 janeiru 2025, husu hotu-hotu atualiza rikusoin. Kuandu la kumpre mak CAC sei aplika koima.
“Lei Medida Prevensaun Kombate Korrupasaun (MPKK) númeru: 7/2020, 26 agostu, fó biban ba CAC atu ezekuta artigu 48 to’o artigu 53 ne’ebé iha relasaun ho deklarasaun rikusoin,” nia esklarese.
Aleinde ne’e, nia haktuir, durante 2024 CAC mós rejista kargu xefia ne’ebé sees an ona husi sira-nia mandatu iha ema na’in 155, maibé tuir lei MPKK nafatin aprezenta sira-nia rikusoin.
¨Lei dehan bainhira nia ramata nia mandatu ohin, bá oin to’o loron 30 hakarak ka lakohi nia tenke presta nia deklarasaun para heteten katak nia hahú nia kargu ho nia rikusoin hira no nia termina fali ho nia rikusoin hira,” nia informa.
Antonino haklaken lei MPKK fó dalan ba funsionáriu sira ne’ebé laiha kargu ne’e bele aprezenta sira-nia deklarasaun rikusoin ba CAC, tanba ne’e durante 2024 iha funsionáriu 242 mak oras ne’e rejistadu iha sistema DBRI.
Jornalista: Natalino Costa
Editór: Xisto Freitas da Piedade
