DILI, 16 janeiru 2025 (TATOLI)—Ministru Justisa, Sérgio Hornai, hateten Ministériu Justisa liuhosi Diresaun Jerál Servisu Rejistu Notariadu iha inísiu fulan ne’e simu tan kaderneta pasaporte ho kuantidade 67.520 husi empreza Thales. Kaderneta pasaporte refere Governu halo akizisaun iha tinan kotuk.
“Ita simu tan ona kaderneta pasaporte pur volta 67.520. Pasaporte sira-ne’e kompostu husi Pasaporte Komun, Pasaporte Servisu no Pasaporte Diplomata. Pasaporte sira-ne’e agora daudaun ita prezerva hela iha Servisu Rejistu Notariadu nia fatin para sira halo jestaun hodi responde ba preukupasaun sira,” Sérgio tenik ba jornalista sira iha nia knaar fatin, kinta ne’e.
Notísia relevante: Kaderneta Pasaporte rihun 60-resin sei to’o iha finál dezembru
Hornai hateten, bá oin governu sei tau importánsia ba asuntu pasaporte hodi responde ba nesesidade populasaun nian.
“Ita-boot sira hatene ita-nia populasaun ne’e milaun ida resin. Ita sei haree katak pasaporte kuantidade 67.520 ne’e bele la to’o tuir demanda populasaun nian, maibé ekipa Servisu Notariadu tenke halo jestaun didi’ak para bele responde ba demanda populasaun ninian,” nia esklarese.
Jornalista: Natalino Costa
Editór: Xisto Freitas da Piedade