DILI, 16 janeiru 2025 (TATOLI)—Ministru Justisa, Sérgio Hornai, fó ona instrusaun ba Diresaun Jerál Servisu Notariadu (DJSN) atu emite Billete Identidade (BI) orijinál ba sidadaun sira.
Nia simu mensajen balun husi sidadaun sira ne’ebé lamenta katak tanbasá mak to’o agora Ministériu Justisa seidauk prodús Billete Identidade orijinál.
“Ha’u fó instrusaun para dokumentu hotu-hotu ne’ebé ita hasai tenke ofisiál. Estadu labele prodús buat ne’ebé kontráriu,” Sérgio hateten ba jornalista sira iha nia knaar fatin, kinta ne’e.
Notísia relevante: Sidadaun 58.380 iha Covalima seidauk iha sertidaun moris no billete identidade
Tuir nia, Governasaun Dasiak ne’ebé nia mandatu to’o tinan 2028 hakarak presta atendimentu ne’ebé di’ak ba sidadaun sira.
“Konserteja mákina emisaun Billete Identidade nian balun avaria hela maibé agora daudaun ita buka atu hadi’a. Ita rezolve ida pur ida nune’e ita bele presta servisu ne’ebé di’ak ba ita-nia sidadaun sira,” nia konklui.
Jornalista: Natalino Costa
Editór: Xisto Freitas da Piedade