DILI, 16 janeiru 2025 (TATOLI)—Ministru Justisa, Sérgio Hornai, hateten Ministériu Justisa (MJ) sei deside dezeñu Bill of Quantity (BOQ) ba konstrusaun Sentru Juvenil ne’ebé sei hahú tinan ne’e.
“Kona-ba konstrusaun Sentru Juvenil ne’e, ikusliu ha’u hala’o reuniaun ida ho Konsellu Administrasaun Fundu Infraestrutura (KAFI) hodi ko’alia kona-ba dezeñu BOQ ba Sentru Juvenil. Ita hakarak iha dezeñu di’ak ba konstrusaun. Tanba ne’e, ita deside tinan ida-ne’e mak ita hahú fali nia dezeñu BOQ,” Sérgio Hornai hateten ba jornalista sira iha nia kna’ar fatin, kinta ne’e.
Governante ne’e dehan Ministériu Justisa tinan ne’e fó prioridade ba projetu boot rua, mak hanesan konstrusaun ba prizaun boot iha Weberek no konstrusaun Sentru Juvenil ne’e rasik.
Notísia relevante: Planu konstrusaun Sentru Juvenil tama ona iha faze BoQ
“Teknikamente sira (KAFI) mak haree ida-ne’e maibé politikamente ita manifesta ita-nia interese para bele dezeña BOQ ho detallu,” nia adianta.
Sérgio esplika katak fatin ba konstrusaun Sentru Juvenil, Ministériu Justisa indika ona rai iha Suku Tibar, Postu Administrativu Bazartete, Munisípiu Liquiçá, nu’udár fatin ba futura instalasaun Sentru Juvenil, ne’ebé sei gasta orsamentu Estadu ho montante Dolar Amerikanu Milaun 1.
Jornalista: Natalino Costa
Editór: Xisto Freitas da Piedade