DILI, 17 janeiru 2025 (TATOLI)—Ajénsia Nasionál Investigasaun Kriminál Koreia Súl deside halo apreensaun ba Prezidente Yoon Suk Yeol, kuarta ne’e, tanba akuzasaun rebelliaun no impoin lei marsiál iha inísiu dezembru 2024.
Sita husi REUTERS (15/01), kapturasaun dahuluk ba Prezidente ida, hanesan buat foun ida-ne’ebé mosu iha nasaun demokrasia ida-ne’ebé dinámiku liu iha Ázia, maski nasaun ne’e iha istória hadadur antigu líder sira.
Desde deputadu sira vota atu impeach nia tuir nia deklarasaun lei marsiál iha loron 03 dezembru, Yoon subar iha nia rezidénsia ho seguransa másimu husi forsa seguransa privadu ida-ne’ebé maka impede tentativa kapturasaun.
Yoon hateten katak nia entrega nia-an ba interogatóriu hodi evita violénsia hafoin Ofisiál Polísia 3.000-resin maka halo liña iha nia rezidénsia hodi kaer nia iha kuarta madrugada.
“Ha’u deside hatán ba investigasaun Ofisiál Altu sira (CIO), maski hanesan investigasaun ilegál ida hodi prevene ema fakar raan,” Yoon hateten hodi refere ba Gabinete Investigasaun Korrupsaun nian ba CIO ne’ebé maka lidera hela investigasaun.
Notísia relevante : Governu Koreia Súl sei deporta traballadór timoroan 11 iha semana ne’e
Yoon depois sai husi nia rezidénsia iha konvoi karreta nian no to’o iha eskritóriu CIO nian.
Autoridade sira iha oras 48 hodi investiga Yoon, hafoin ne’e sira tenke hatama mandadu ida hodi detein nia to’o loron-20 ka liberta nia.
Yoon nia advogadu sira hateten katak mandadu kapturasaun ne’e ilegál tanba ida-ne’e fó sai husi Tribunál ida iha jurisdisaun ne’ebé sala no ekipa ne’ebé forma atu investiga laiha mandatu legál atu halo ida-ne’e.
Yoon nia deklarasaun kona-ba lei marsiál halo populasaun koreanu sira hakfodak no halo nakdoko país ekonomia boot dahaat iha Ázia.
Deputadu sira vota atu hasai nia husi kargu no husi nia knaar sira iha loron 14 dezembru.
Iha fatin ketak, Tribunál Konstitusionál sei tetu atu defende no hasai permanentemente nia husi kargu ka fó hikas poder Prezidente ba nia liman.
Jornalista : Nelson de Sousa
Editora : Julia Chatarina