DILI, 20 janeiru 2025 (TATOLI)—Ekipa Traballu Reforma Justisa alarme ba Ministériu Justisa (MJ) atu rezolve problema sira hanesan menus rekursu umanu iha setór justisa, lori justisa besik liu povu, infraestrutura, língua inklui halo revizaun ba lei vizente sira.
“Buat ida ha’u hakarak hateten katak asuntu importante ida hosi asuntu sira seluk ne’ebé Ekipa Traballu Reforma Justisa rekomenda ba MJ mak rekursu umanu. Tenke iha ema ida ho kualifikasaun aas, infraestrutura ida ke natón, ema ne’ebé iha kbiit atu halo desizaun, iha kapasidade halo kooperasaun institusionál no iha koñesimentu tékniku kona-ba servisu ne’ebé nia halo,” Ministru Justisa, Sergio Hornai hateten ba TATOLI iha edifísiu Ministériu Finansa, Ai-tarak Laran, Dili, segunda ne’e, relasiona ho Ekipa Traballu Reforma Justisa ne’ebé entrega ona relatóriu ba MJ.
Nia dehan, iha aspetu rekursu umanu, Governu Timor-Leste foin daudaun haruka ona estudante na’in 50 bá estuda iha Portugal iha área justisa nian inklui kandidatu juíz balun bá tuir ona formasaun iha Portugal, atu eleva rekursu hirak-ne’e nia koñesimentu no kapasidade iha téknika jurídika.
Notísia relevante: PM Xanana husu Grupu Traballu Reforma Justisa prodús rekomendasaun konkreta
Hornai hatutan katak sira sei halo tan rekrutamentu juíz internasionál nune’e bele kontribui no reforsa servisu setór justisa iha Timor-Leste no mós aumenta majistradu judisiál sira, majistradu Ministériu Públiku no defensór sira ho objetivu atu lori justisa besik liu povu.
Nia subliña, kona-ba infraestrutura, agora daudaun Governu inisia Tribunál Judisiál Primeira Instánsia sira iha munisípiu hotu-hotu.
Ekipa Traballu Reforma Justisa harii husi Primeiru-Ministru, Kay Rala Xanana Gusmão iha tinan 2023, liderada hosi antiga Ministra Justisa, Lúcia Freitas Lobato, atu ajuda hadi’a no reforma sistema justisa. Grupu ne’e halo diagnóstiku ba justisa, apoiadu husi parseiru internasionál sira hanesan Programa Dezenvolvimentu Nasaun Unida (UNDP-sigla inglés), ne’ebé sira rekruta matenek na’in lubuk ida hodi apoia timoroan sira.
Ekipa Traballu referidu iha finde sira-nia mandatu, sei prepara rekomendasaun konkreta ligadu ba reforma setór justisa nune’e tribunál sira bele servisu no hatán ba povu tomak nia preukupasaun katak asesu ba justisa tenke ba ema hotu no tribunál sira-nia servisu atu garante justisa ba nasaun nia di’ak.
Jornalista: Natalino Costa
Editór: Xisto Freitas da Piedade