PM Xanana husu Grupu Traballu Reforma Justisa prodús rekomendasaun konkreta
DILI, 19 fevereiru 2024 (TATOLI)–Primeiru-Ministru (PM), Kay Rala Xanana Gusmão, segunda ne’e, konvoka enkontru ho Grupu Traballu Reforma Setór Justisa, ne’ebé akompaña mós hosi Ministru Justisa, Sergio Hornai.
Grupu Traballu ne’e kompostu hosi Koordenadora, Lúcia Lobato, Antigu Prezidente Tribunál Rekursu, Cláudio Ximenes, inklui Paula Fernando (CES-Coimbra), Patrick Keuleers (UNDP), Miguel Lemos (Konsultór UNDP), Sahe Silva (Konsultór UNDP) no Bruno Lencastre (UNDP).
Biban ne’e, Koordenadora Lúcia Lobato, haktuir, grupu traballu ne’e estabelese hosi Primeiru-Ministru desde tinan 2023 hodi reforma justisa, halo diagnóstiku ba justisa, konta ho apoiu hosi parseiru internasionál, tanba ne’e liuhosi Programa Dezenvolvimentu Nasaun Unida (UNDP, sigla inglés) rekruta matenek na’in lubuk ida hodi apoia ne’ebé inklui mós timor-oan na’in-rua.
“Grupu traballu apoia Governu atu prepara rekomendasaun konkreta, Primeiru-Ministru husu atu ami aprezenta rekomendasaun konkreta no lakohi relatóriu naruk. Iha rekomendasaun kurtu prazu ne’ebé mak Governu tenke implementa kedas, tenke iha mós rekomendasaun médiu no longu prazu,” Antigu Ministra Justisa ne’e relata hafoin hamutuk ho ekipa hasoru Xefe Ezekutivu, iha Palásiu Governu.
Notísia relevante : TL sei kontrata péritu internasionál reforsa ekipa ba reforma justisa
Molok Grupu Traballu hasoru PM Xanana, sira hasoru uluk ona Prezidente Tribunál Rekursu, Deolindo dos Santos, no tuir planu sei hasoru mós Prezidente Repúblika, Bankada Parlamentár, Akadémiku, Advogadu privadu, sosiedade sivil, emprázariu, grupu feto, inklui entidade ne’ebé haree liu ba atividade kona-ba direitu labarik.
Asuntu ne’ebé Grupu Traballu diskute ho Prezidente Tribunál Rekursu no Xefe Governu mak hanesan tenke tau atensaun maka’as hodi reforsa rekursu umanu iha setór justisa. Prezidente Tribunál Rekursu hateten katak iha lei lubuk ida ne’ebé tenke hadi’a, halo lei foun balun no lei balun ne’ebé tenke hasai tiha tanba la kondís ho realidade nasaun, enkuantu asuntu seluk mak entidade rua husu atu haree infraestrutura.
Hafoin serbisu hotu, grupu sei prepara dokumentu hotu ho rekomendasaun atu hato’o ba PM hodi Governu bele konsidera.
“Ekipa ne’e serbisu to’o marsu 2024, Primeiru-Ministru husu labele lalais tanba lalais sei lufu-lafu de’it, maibé mós labele dada naruk tanba Governu iha programa ne’ebé atu kumpre. Serbisu Grupu Traballu ne’e importante tebes atu ajuda Governu reforma setór justisa atu nune’e Tribunál sira bele serbisu no hatán ba povu tomak nia preokupasaun, katak asesu ba justisa tenke ba ema hotu no Tribunál sira-nia serbisu atu garante justisa ba ita tomak,” nia tenik.
Jornalista : Antónia Gusmão
Editora : Julia Chatarina
